АҚШ, Канада ва Мексика майдонларида бўлиб ўтадиган Жаҳон чемпионатида қайси клублардан энг кўп футболчи иштирок этишига оид рўйхат эълон қилинди. Рейтингда Англиянинг “Манчестер Сити” клуби 19 нафар футболчи билан пешқадамлик қилмоқда.
Германиянинг “Бавария” 18 нафар футболчи билан иккинчи поғонани эгаллаб турган бўлса, Франциянинг “ПСЖ” ва Лондоннинг “Арсенал” клублари кучли учликни банд этган (ҳар иккисида ҳам 16 нафардан футболчи). Каталониянинг “Барселона” клуби эса 15 нафар футболчи билан кейинги ўринда қайд этилган.
Рўйхатнинг кейинги поғоналарида “Манчестер Юнайтед”, “Кристал Пэлас”, “Атлетико Мадрид” ҳамда Саудия Арабистонининг “Ал-Ҳилол” клублари қайд этилган. Ушбу жамоаларнинг ҳар биридан 12 нафардан футболчи Жаҳон чемпионатида иштирок этиши кутилмоқда. Мадриднинг “Реал” клубидан 2026 йилги Жаҳон чемпионатига бор-йўғи 11 нафар футболчи иштирок этади — бу жамоанинг 2010 йилдан буён қайд этган энг паст кўрсаткичидир. Аслида бу рақам анча юқори бўлиши мумкин эди, бироқ турли жароҳатлар ва мураббийларнинг танлови сабабли Милитао, Родриго, Камавинга, Хейсен, Мастантуоно ҳамда Трент Александер-Арнольд каби футболчилар ўз терма жамоаси қайдномасидан жой олмади.
Ўзбек клубларидан қайсилари энг кўп футболчи жўнатган?
Мундиалда ўзбек клубларидан жами 16 нафар футболчи иштирок этади. Ўзбек клублари орасида энг кўп футболчи жўнатган жамоалар рўйхати қуйидагича:
- “Пахтакор” — 5 нафар футболчи (Ҳожиакбар Алижонов, Акмал Мозговой, Шерзод Насруллаев, Достонбек Ҳамдамов, Зайд Таҳсин (Ироқ));
- “Нефтчи” — 3 нафар футболчи (Фарруҳ Сайфиев, Жамшид Искандеров, Ботирали Эргашев);
- “Насаф” — 2 нафар футболчи (Абдувоҳид Неъматов, Умар Эшмуродов);
- “Динамо” — 2 нафар футболчи (Азизбек Амонов, Жаҳонгир Ўрозов);
- “Навбаҳор” — 1 нафар футболчи (Ўткир Юсупов);
- “Бухоро” — 1 нафар футболчи (Шерзод Эсанов);
- “Сурхон” — 1 нафар футболчи (Беҳрузжон Каримов);
- “ОКМК” — 1 нафар футболчи (Авазбек Ўлмасалиев).
Маълумот учун, 2026-йилги Жаҳон чемпионати 11 июндан 19 июлгача бўлиб ўтади. Ушбу турнир тарихда илк бор 48 та терма жамоа иштирок этадиган ҳамда бир вақтнинг ўзида учта давлат — АҚШ, Канада ва Мексика мезбонлик қиладиган дастлабки мундиал сифатида тарихга киради.
