Нью-Йорк аҳолиси 2026-йилги Жаҳон чемпионати ўйинларига 50 долларга чипта сотиб олиши мумкин. Бу ҳақда мегаполис мери Зоҳран Мамдани эълон қилди.
Аввалроқ ОАВ чипталар сотуви қайта тиклангач, FIFA финал ўйини нархини 10 990 долларгача оширгани ҳақида хабар берган эди. 11 июнь куни Мехикода ўтадиган Мексика ва ЖАР ўртасидаги очилиш учрашуви чипталари эса ҳозирда 2 985 доллардан таклиф этилмоқда (бунга қадар нархлар 2 355 доллар эди).
“Минг нафар Нью-Йорк аҳолиси 50 доллар эвазига чипта харид қилади ва автобусда бепул бориб-келиш имкониятига эга бўлади. Нью-Йорк бошқаларга ўрнак бўлаётганидан фахрланаман”, деди Мамдани.
Бир киши иккитадан чипта сотиб олиш ҳуқуқига эга бўлади. Ғолиблар 25 май куни старт оладиган лотерея орқали аниқланади. Ушбу дастур гуруҳ босқичининг бешта ва плей-оффнинг иккита учрашувини қамраб олади.
Маълумот учун, 2026-йилги Жаҳон чемпионати тарихда илк бор 48 та терма жамоа иштирокида ўтказилади. Шунингдек, у бир вақтнинг ўзида учта мамлакат — АҚШ, Мексика ва Канада мезбонлик қиладиган биринчи турнир бўлади. Мусобақа 11 июндан 19 июлгача давом этади.
