Эрон Ливандаги ҳарбий ҳаракатларга норозилик сифатида АҚШ билан алоқаларни тўхтатди. Бу ҳақда Tasnim ахборот агентлиги хабар берди.
“Сионистик режимнинг Ливандаги шафқатсизликлари давом этмоқда. Ливан масаласи ўт очишни тўхтатишнинг асосий шартларидан бири эди. Аммо ҳозирда бу келишув бузилди. Шу сабабли Эрон музокаралар гуруҳининг учрашувларини ва воситачилар орқали матн алмашишни тўхтатди”, дейилади хабарда.
Нашрининг қайд этишича, Эрон расмийлари ва музокарачилари Ливанда ўт очишни тўхтатиш ҳамда Исроил қўшинларини олиб чиқиб кетиш зарурлигини бир неча бор таъкидлаган.
“Эрон ва қаршилик кўрсатиш кучларининг талаблари бажарилмагунча мулоқот қайта тикланмайди”, деб қўшимча қилинган хабарда.
Бундан ташқари, Эрон ва Ливандаги қаршилик кўрсатиш кучлари Ҳормуз бўғозини бутунлай ёпиб қўйиш ниятида эканини маълум қилди. Улар “сионистлар ва уларнинг тарафдорларини жазолаш” мақсадида бошқа фронтларни, жумладан, Боб ал-Мандаб бўғозини ҳам фаоллаштирмоқчи.
Май ойининг охирида Исроил бош штаби раҳбари Эял Замир баёнот берган эди. У Исроил барча фронтларда “Ҳизбуллоҳ” кучларига зарба беришни давом эттираётганини айтди. Кейинчалик Нетаньяху Исроил мудофаа армиясига (САХАЛ) Ливандаги ҳудудий назоратни кенгайтириш ва чуқурлаштиришни буюрди.
The Jerusalem Post нашрининг ўз манбаларига таяниб 31 май куни хабар беришича, Исроилнинг юқори мартабали расмийлари америкалик ҳамкасбларидан Ливан пойтахти Байрутга зарбаларни кучайтириш учун рухсат сўраган. шундан сўнг, Исроил мудофаа вазири Исроил Кац армияга пойтахтнинг жанубий чеккаларидаги “Ҳизбуллоҳ” объектларига зарба бериш бўйича кўрсатма берган.
Трамп Эрон билан келишиб бўлинган шартномага ўзгартириш киритишни талаб қилди
АҚШ президенти Дональд Трамп Вашингтон ва Теҳрон ўртасидаги тинчлик келишуви лойиҳасига бир қатор ўзгартиришлар киритишни талаб қилган. Америкалик амалдорларнинг сўзларига кўра, Трамп келишувда Эроннинг ядровий дастурига оид аниқ ён беришларини кўришни истайди. Келишувнинг ҳозирги кўриниши фақат Эроннинг ядро қуролини яратмаслик мажбуриятини ўз ичига олади.
Трамп эса шартномада АҚШ бойитилган Эрон уранини қандай муддат ва шартлар асосида олишини аниқроқ белгилаб қўймоқчи. Axios нашри суҳбатдошларидан бирининг айтишича, Трамп, шунингдек, Ҳормуз бўғози фаолиятини тиклашга оид айрим жумлаларни ҳам ўзгартиришни хоҳлайди.
