АҚШнинг Нью Йорк ва Нью Жерси штатлари прокуратураси 2026 йилги Жаҳон чемпионати чипталари нархи ҳамда ўриндиқлар жойлашуви билан боғлиқ эҳтимолий фирибгарлик ҳолатлари бўйича Халқаро футбол федерацияси (FIFA) устидан тергов бошлади.
Нью Йорк бош прокурори Летиция Жеймс ҳамда Нью Жерси бош прокурори Женнифер Девенпорт 27 май, чоршанба кунги баёнотида ЖЧ—2026 ўйинлари учун белгиланган нархлар “аввалги ҳар қандай мундиал нархларидан ошиб тушганини” таъкидлади.
Штат расмийларининг эътиборини тортган асосий муаммо шундаки, футбол ишқибозлари стадионнинг яхши жойидан умид қилиб қиммат чипта сотиб олган, бироқ амалда уларга майдондан анча узоқ ва ноқулай ўриндиқлар берилган.
Бунга FIFA тарихда илк бор талабга қараб нархни ўзгартириш тизимини қўллагани сабаб бўлгани айтилмоқда. Ташкилот дастлабки чипталарни сотиб бўлганидан сўнг кутилмаганда “Front Category” (Олдинги тоифа) деб номланган қимматбаҳо чипталар турини жорий қилган ва оқибатда аввал чипта харид қилган мухлисларнинг жойлари орқага сурилиб кетган.
Октябрь ойида сотувга чиққан чипталарнинг нега бунчалик қимматлигига изоҳ сўралганда, FIFA президенти Жанни Инфантино буни бутунжаҳон миқёсидаги улкан талаб ва чипталар тақчиллиги билан оқлашга уринди.
Ҳозирда прокуратура АҚШдаги “MetLife” стадионида ўтадиган 8 та ўйин (жумладан, 19 июль кунги финал, гуруҳ ва плей-офф баҳслари) учун нархлар қандай шакллантирилгани ва жойлар нега нотўғри тақсимлангани бўйича FIFAдан тўлиқ ҳужжатларни талаб қилмоқда.
“Мухлислар қиммат нархга чипта олишга мажбур қилинмаслиги ва ўзлари харид қилган жойдан футболни томоша қила олишларига ишончи комил бўлиши керак. FIFA Жаҳон чемпионатига чипта сотиш жараёнини тартибсизлик, сунъий тақчиллик ва қиммат нархлар майдонига айлантирди. Буларнинг барчаси оддий истеъмолчилар ва мухлислар ҳисобидан амалга оширилмоқда”, дейди бош прокурор Женнифер Девенпорт.
Ушбу тергов жараёни ЖЧ—2026 ўйинларига чипта сотиб олган, аммо якуний жойлашувдан ўзини алданиб қолгандек ҳис қилаётган минглаб мухлисларнинг ҳуқуқларини ҳимоя қилишга қаратилган.
