“Милан” ярим ҳимоячиси Лука Модрич 2026 йилги Жаҳон чемпионатидан сўнг профессионал фаолиятини якунлашини эълон қилади. Бу ҳақда журналист ва инсайдер Николо Скира X ижтимоий тармоғидаги саҳифасида хабар берди.
Сентябрь ойида хорватиялик футболчи 41 ёшга тўлади. Аввалроқ, Модрич “Милан” билан шартномасини узайтирмаслиги ва ёзда жамоани тарк этиши ҳақида хабар берилган эди. Яқин вақт ичида футболчи миллий терма жамоа билан биргаликда ўз фаолиятидаги сўнгги Жаҳон чемпионатига йўл олади.
Модрич “Милан”га 2025 йилнинг ёзида эркин агент мақомида ўтган эди. Якунланган мавсумда ярим ҳимоячи “россонери” сафида 37 та ўйинда майдонга тушиб, 2 та гол урди ва 3 та голли узатмани амалга оширди. Футболчининг “Милан” билан амалдаги шартномаси 2026 йилнинг 30 июнига қадар мўлжалланган. Transfermarkt портали маълумотларига кўра, футболчининг тахминий баҳоси 4 миллион еврони ташкил этади.
Эслатиб ўтамиз, футболчи фаолияти давомида “Реал Мадрид”, “Тоттенҳэм”, Загребнинг “Динамо”, “Интер Запрешич” ва “Зринвски” клубларида тўп сурган.
