Мадриднинг “Реал” клуби ярим ҳимоячиси Лука Модрич фаолиятини Италия А Сериясида давом эттиради. Бу ҳақда футбол инсайдери Фабрицио Романо хабар бермоқда.
Манбага кўра, 39 ёшли хорватиялик футболчи Клублар ўртасидаги Жаҳон чемпионати (КЎЖЧ) якунлангач, “Милан” клуби билан шартнома имзолайди. Томонлар оғзаки келишувга эришган ва АҚШдаги турнир якунлангач, ярим ҳимоячи миланликлар учун тиббий кўрикдан ўтиши кутилмоқда.
Лука Модрич 2012 йилдан бери “Реал Мадрид” сафида ҳаракат қилиб келмоқда. Жорий мавсум у барча мусобақалар доирасидаги 59 та ўйинда майдонга тушиб, ўз ҳисобига 4 та гол ва 9 та голли узатма ёздириб қўйган. Унинг клуб билан шартномаси шу ойнинг охирига қадар амал қилади. Transfermarkt портали ярим ҳимоячининг қийматини 4 миллион еврога баҳоламоқда.
Эслатиб ўтамиз, 27 июнь куни “қироллик клуби” Клублар ўртасидаги Жаҳон чемпионати гуруҳ босқичидаги сўнгги учрашувини Австриянинг “Зальцбург” клубига қарши ўтказади.
