Испания, Ирландия ва Словения давлат телеканаллари 11 май куни шу ҳафтада бўлиб ўтадиган 70 йиллик “Евровидение” қўшиқчилик танловини намойиш этмаслигини маълум қилди. Улар Исроилнинг ушбу шоуда иштирок этишига норозилик сифатида танловни бойкот қилмоқда. Бу ҳақда France 24 хабар берди.
Мазкур учта давлат, шунингдек, Нидерландия ва Исландия Вена шаҳрида ўтадиган 2026 йилги танловда иштирок этишдан воз кечган эди. Танлов 12 май куни бошланди ва 16 май куни финал билан якунланади.
Исроилнинг Ғазо секторидаги уруши бешта давлатнинг дунёдаги энг йирик мусиқий тадбирдан чиқиб кетишига сабаб бўлди. “Евровидение” директори Мартин Грин бу мамлакатларни қайтариш учун барча чораларни кўришга ваъда берди.
2025 йилда Швейцариянинг Базел шаҳрида ўтган танловда Исроил фойдасига овоз бериш тизими манипуляция қилингани ҳақида шубҳалар пайдо бўлган эди. Айрим телеканаллар медиа эркинлиги борасида ҳам хавотир билдирган. Чунки Исроил журналистларнинг Ғазога киришига тўсқинлик қилиб келмоқда.
“ ‘Евровидение’ цирки ўрнига миллий телеканалимизда ‘Фаластин овозлари’ туркумидаги кўрсатувлар намойиш этилади”, деб баёнот берди Словениянинг РТВ канали.
Ирландиянинг RТЕ канали танлов вақтида бошқа кўнгилочар дастурларни намойиш этади. Хусусан, 14 май куни 1993 йилги танловда ғолиб бўлган ирландиялик Ниам Кавана иштирокидаги дастур, финал куни эса машҳур “Ота Тед” комедиясининг мусиқий қисми эфирга узатилади.
Испаниянинг RTVE канали эса “Мусиқа уйи” номли махсус дастурини тақдим этади. Нидерландия ва Исландия танловда иштирок этмаса-да, уни эфирга узатишга қарор қилган.
Иштирокчилар сони камайди
Беш давлат чиқиб кетиши оқибатида 2026 йилда танловда атиги 35 та давлат қатнашмоқда. Бу 2004 йилдан буён энг паст кўрсаткичдир.
Мартин Гриннинг айтишича, Исроилнинг KAN телеканалига томошабинларни “Исроил учун 10 марта овоз беришга” чақирувчи видеоларни тўхтатиш ҳақида огоҳлантириш юборилган. Бундай ҳаракатлар мусобақа қоидаларига зид деб топилган. Бу йил овоз бериш адолатли бўлиши учун ярим финалга профессионал ҳакамлар ҳайъати қайтарилди.
“Бу қўрқоқлик”
Amnesty International халқаро инсон ҳуқуқлари ташкилоти “Евровидение” ташкилотчиларини кескин танқид қилди. Ташкилот бош котиби Агнес Калламарнинг айтишича, 2022 йилда Россияни четлатган ташкилотнинг Исроилга нисбатан бундай қилмаслиги “иккиёқлама стандарт ва қўрқоқлик”дир.
“Исроилнинг иштироки мамлакатга Ғазодаги геноциддан эътиборни чалғитиш ва вазиятни одатий ҳолдек кўрсатиш учун имкон беради. Қўшиқлар ва ялтироқ либослар Фаластин халқининг азоб-уқубатларини тўсиб қўймаслиги керак”, деди у.
