Колумбиялик хонанда Шакира 2026 йилги Жаҳон чемпионатининг расмий мадҳияси – “Даи Даи” қўшиғининг қисқача тақдимотини (тизер) эълон қилди.
49 ёшли Шакира ушбу таронани нигериялик хонанда Бурна Бой билан ҳамкорликда ижро этган бўлиб, қўшиқнинг тўлиқ премераси 14 май куни бўлиб ўтади.
“Гремми” мукофотининг тўрт карра соҳибаси ўзининг ижтимоий тармоқларида бир дақиқалик видеолавҳа жойлаштирди. Унда қўшиқдан парча янграган, хонанданинг ўзи эса Рио-де-Жанейродаги афсонавий “Маракана” стадионида бир гуруҳ раққослар ҳамроҳлигида чиқиш қилаётганини кўриш мумкин. Шакира ушбу таронада италян тилидаги “даи, даи” (Олға) сўзларини инглизча ва испанча иборалар билан бирлаштирган.
Маълумот учун, бу Жанубий Африкада ўтган ЖЧ-2010 турниридаги “Waka Waka (This time for Africa)” қўшиғидан кейин Шакиранинг фаолиятидаги иккинчи расмий Жаҳон чемпионати мадҳиясидир.
У, шунингдек, 2006 ва 2014 йилги Жаҳон чемпионатлари финалларида ҳам чиқиш қилган.
АҚШ, Канада ва Мексика мезбонлик қиладиган Жаҳон чемпионати 2026 йилнинг 11 июнь куни Мехико шаҳридаги “Ацтека” стадионида бўлиб ўтадиган Мексика ҳамда Жанубий Африка терма жамоалари ўртасидаги учрашув билан старт олади.
Ўзбекистон терма жамоаси ҳам гуруҳ босқичидаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади. Жамоа иккинчи турда Криштиану Роналду бошчилигидаги Португалия терма жамоаси билан ўйнайди. Мазкур беллашув АҚШдаги “Хьюстон” стадионида бўлиб ўтади. 3-тур доирасидаги Конго Демократик Республикасига қарши баҳс 3-тур учрашуви эса 28 июнь куни “Атланта” стадионида ўтказилади.
