АҚШ президенти Дональд Трамп Эрон бўйича музокаралар учун Исломободга кетиши керак бўлган икки вакилининг сафарини бекор қилди.
АҚШ томонидан музокараларда Трампнинг махсус вакили Стив Уиткофф ва куёви Жаред Кушнер қатнашиши керак эди. Президент Эроннинг музокаралардаги позицияси сабабли ташрифни бекор қилганини айтди.
Бир оз аввал одамларим учишга шайланиб турганида уларга: “Йўқ, у ерга 18 соат учиб бормайсизлар. Барча “козир” карталар бизнинг қўлимизда. Улар бизга исталган вақтда қўнғироқ қилиши мумкин, аммо сизлар шунчаки ҳеч нарсани муҳокама қилиб ўтириш учун бошқа 18 соатлик парвозларни амалга оширмайсиз, дедим, дея Трампнинг сўзларидан иқтибос келтирмоқда Fox News.
Axios журналисти Барак Равид ҳам Трамп билан телефон орқали гаплашганини ва президент унга Уиткофф ҳамда Кушнернинг сафари бекор қилинганини тасдиқлаганини айтди.
“Ҳозирги вазиятда уларни 18 соатлик парвозга жўнатишдан маъно кўрмаяпман. Бу жуда узоқ. Биз буни телефон орқали ҳам қилишимиз мумкин”, деган Трамп унга.
Бу урушнинг қайта бошланишини англатадими деган саволга АҚШ президенти “йўқ, бу ҳақда ҳали ўйламаганмиз” дея жавоб берди.
Al Jazeera хабарига кўра, Эрон ташқи ишлар вазири Аббос Ароқчи Покистон расмийлари, жумладан, бош вазир Шаҳбоз Шариф билан учрашувдан сўнг Исломободни тарк этган. Покистон ва Эрон делегациялари учрашув ўтказиб, унда Эроннинг “қизил чизиқлари”га аниқлик киритиб, ўзаро келишув учун имкониятлар муҳокама қилинган.
Маълумот ўрнида, Эрон ва АҚШ ўртасидаги илк музокаралар 11 апрель куни Исломобод шаҳрида бўлиб ўтган эди. Ўшанда 21 соат давом этган музокара натижасиз якунланганди.
Томонлар 22 апрель куни учрашиши кутилаётган эди. Трамп 19 апрель куни АҚШ делегациясини музокараларга юборганини эълон қилди. Axios эса Эрон олий раҳнамоси Можтаба Хоманаий 20 апрель куни музокара ўтказишга рухсат берганини хабар қилди. Бироқ Tasnim агентлиги Эрон 22 апрелга белгиланган АҚШ билан музокаралар ўтказишдан узил-кесил бош тортганини маълум қилганди.
Шундан сўнг, АҚШ президенти Дональд Трамп 22 апрель куни тугаши керак бўлган Эрон билан ўт очишни тўхтатиш сулҳини номаълум муддатга узайтирди. Трамп тегишли қарорни Покистон илтимосига кўра қабул қилганини айтди.
