Украина президенти Владимир Зеленский 20 апрель куни эълон қилинган интервьюсида Россия нефтини Шарқий Европа мамлакатларига етказиб берувчи “Дружба” қувури апрель ойи охиригача қайта тикланишини айтди. Бу ҳақда Reuters хабар берди.
“У апрель ойи охиригача ишлашга тайёр бўлади”, деди Зеленский украин телеканалларидан бирига берган интервьюсида.
Мазкур интервью эфирга узатилишидан олдин ёзиб олинган, бироқ унинг айнан қачон ёзиб олингани ҳозирча аниқ эмас. Зеленский март ойи бошида қувур таъмирланмаслигини ва бунга хоҳиши йўқлигини айтганди. Айни пайтда, Украинанинг “Нафтогаз” давлат энергетика компанияси қувур фаолияти қачон тикланиши бўйича изоҳ беришни рад этди.
Венгрия ва Словакия билан боғлиқ вазият
Венгриядаги сайловлар ғолиби Петер Мадяр 20 апрель куни Зеленскийни қувур тайёр бўлиши билан уни тезроқ очишга чақирди. Шунингдек, у Россиядан нефть етказиб беришни қайта тиклашни сўради.
“Украина президентига шуни айта оламанки — гарчи биз гаплашмаган бўлсак ҳам — бу ўйин эмас. Агар ‘Дружба’ қувури нефть ташишга яроқли бўлса, у ваъда қилинганидек очилиши керак. Шунингдек, биз Россияни қувурга нефть етказиб беришга чақирамиз. Россия нефтисиз қувур ишлай олмайди”, деди Мадяр.
Венгриянинг амалдаги бош вазири Виктор Орбан ва Словакия ҳукумати Киевни таъмирлаш ишларини атайлаб кечиктиришда айблаб келади. Украина томони бу айбловларни инкор этмоқда.
Венгрия ва Словакия январь ойи охиридан бери “Дружба” орқали Россия нефтини олмаяпти. Бунга ўша ойда Россия дронининг Украина ғарбидаги қувурга зарба бергани ва унга шикаст етказгани сабаб бўлган.
“Дружба” (Дўстлик) қувури ҳозирда Венгрия ва Словакия учун Россия нефтини импорт қилишнинг ягона йирик йўли бўлиб қолмоқда. Ушбу икки давлат Россия хом ашёсидан ҳали ҳам воз кечмаган охирги Европа Иттифоқи аъзоларидир.
Венгрияда апрель ойида бўлиб ўтган парламент сайловлари олдидан Украинанинг иттифоққа аъзолиги ва Киев билан муносабатлар асосий кампания мавзусига айланган.
