Украина президенти Владимир Зеленскийнинг айтишича, Россия йил бошидан буён Украина томонидан нефть инфратузилмасига берилган зарбалар оқибатида камида 7 миллиард доллар зарар кўрган. Бу ҳақда у ўзининг Telegram каналида ёзди.
“Ҳисоб-китобларга кўра, йил бошидан буён биз Россия нефть саноати ва қайта ишлаш тизимига йўналтирган аниқ зарбаларимиз туфайли агрессор давлат камида 7 миллиард доллар йўқотди”, деди Зеленский.
У ўз баёнотига Туалсе ва Пермдаги ёнаётган объектлар акс этган видеоларни ҳам илова қилган. Зеленский, шунингдек, зарбалар нафақат ишлаб чиқариш объектларини ишдан чиқарганини, балки Россия армиясини таъминлашга хизмат қиладиган тизимларда ҳам узилишлар келтириб чиқарганини таъкидлади.
“Биз узоқ масофали қуролларимизни янада кенгроқ қўллаймиз. Янги қарорлар тайёрланмоқда”, деган Украина президенти.
Ҳарбийларнинг маоши оширилади
Ўша куни Зеленский Украина ҳарбийларининг маошини сезиларли даражада ошириш ва қисқа муддатли контракт тизимини жорий этишни ҳам маълум қилди.
Режага кўра, орқа чизиқдаги ҳарбийларнинг ойлиги қарийб 50 фоизга оширилиб, тахминан, 400 еврога етказилади. Олдинги чизиқдаги пиёда аскарлар учун эса фронт устамаларини уч баравар ошириш, яъни ҳозирги 1900 евродан ҳам кўпроқ қилиш режалаштирилган.
Зеленский ушбу харажатлар қаердан молиялаштирилиши ҳақида аниқ маълумот бермаган. Бироқ апрель ойида Европа Иттифоқи Украинага 90 миллиард евро миқдорида кредит ажратгани, бу маблағнинг бир қисми армияни молиялаштиришга йўналтирилиши мумкинлиги ҳақида хабарлар тарқалганди.
Пермдаги ҳужумлар ва экологик хавф
30 апрель куни “Агенцтво” нашри экологларга таяниб Перм шаҳри Туалседаги вазиятга ўхшаш экологик оқибатларга дуч келиши мумкинлиги ҳақида огоҳлантирган.
Перм — Уралдаги энг йирик беш шаҳардан бири бўлиб, аҳолиси тахминан 1 миллион кишини ташкил этади. Мутахассислар фикрича, 29–30 апрель кунлари Украина дронлари ҳужумлари оқибатида юз берган ёнғинлар ҳудудда “нефть ёмғири”, заҳарли ҳаво ва узоқ муддатли ифлосланиш хавфини келтириб чиқариши мумкин.
Ҳужумда “Пермнефтеоргсинтез” нефтьни қайта ишлаш заводи нишонга олинган — бу мамлакатдаги энг йирик заводлардан бири ҳисобланади.
Шунингдек, “Transneft”га тегишли нефть насос станцияси ҳам зарар кўрган. Ёнғин оқибатида нефтьни бирламчи қайта ишлаш қурилмаси шикастланган ва завод қувватининг қарийб 40 фоизи тўхтаб қолган.
