Малайзиянинг Сабаҳ штатидаги Борнео қишлоғида 19 апрель куни улкан ёнғин содир бўлганди. Дастлаб 200 та уй ёниб кул бўлгани хабар қилинган бўлса, эндиликда ёнғиндан камида 1 000 та уй зарарлангани маълум қилинди. Бу ҳақда Euronews хабар берди.
Таъкидланишича, ҳодиса оқибатида 9 000 дан ортиқ киши ўз бошпанасидан айрилган. Ёнғинга асосан кучли шамол сабаб бўлган. Олов сув устидаги ёғоч устунларга қурилган уйларга тезда тарқалган. Қишлоқда асосан ҳужжатсиз муҳожирлар ва маҳаллий тубжой аҳоли вакиллари истиқомат қилган.
Қутқарувчиларнинг айтишича, бинолар бир-бирига жуда яқин қурилгани ва ёғочдан ясалгани сабаб эвакуация қийин кечган. Маҳаллий расмийнинг сўзларига кўра, фожиага ошхонадаги ёнғин сабаб бўлган бўлиши мумкин. Бироқ ҳуқуқ-тартибот идоралари бу маълумотни ҳали расман тасдиқламади. Ҳозирда барча эвакуация қилинганлар вақтинчалик бошпаналарга жойлаштирилган.
Малайзия бош вазири Анвар Иброҳим федерал ва штат ҳукуматлари уйсиз қолган одамларга имкон қадар тезроқ ёрдам бериш учун қутқарув ишларини мувофиқлаштираётганини маълум қилди.
