Эрон ҳарбийлари баёнотига кўра, бунга АҚШ кучлари томонидан бўғозда давом этаётган блокада сабаб бўлган. Бу ҳақда Fars News Agency хабар берди.
Маълум қилинишича, Эрондан чиқаётган кемалар ҳаракатини чеклашни тўхтатмагунча, бўғоздаги вазият кескин назорат остида ва ўзгаришсиз қолади.
“Ҳормуз бўғози устидан назорат аввалги тартибга қайтарилди ва ушбу стратегик йўлак қуролли кучлар томонидан қатъий бошқарув остига олинди. АҚШ Эрон томонга йўналган ёки ундан чиқаётган кемалар ҳаракатини чеклашни тўхтатмагунча, бўғоздаги вазият кескин назорат остида ва ўзгаришсиз қолади”, дея қўшимча қилди Эрон ҳарбийлари.
Эрон ташқи ишлар вазири Аббос Ароқчи Ҳормуз бўғози барча тижорат кемалари учун тўлиқ очилганини маълум қилган эди. У бу тартиб Исроил ва Ливан ўртасидаги ўт очишни тўхтатиш режими давомида амал қилишини айтганди.
АҚШ президенти Дональд Трамп эса кеча Эрон “энди ҳеч қачон Ҳормуз бўғозини ёпмасликка ваъда берганини” айтганди. Шунингдек, у АҚШ Эрон танкерларига нисбатан блокадани Вашингтон ва Теҳрон ўртасида келишув имзоланмагунча давом эттиришини ҳам таъкидлаган.
