Эрон АҚШ билан урушни тартибга солиш бўйича меморандумни 14 июнь куни имзоламаслигини маълум қилди. Бу сана АҚШ президенти Дональд Трампнинг 80 ёшга тўлган кунига тўғри келади. Бу ҳақда Deutsche Welle ёзмоқда.
Эрон Ташқи ишлар вазирлиги вакили Исмоил Бақоийнинг айтишича, ҳужжатни имзолашнинг аниқ санаси ҳали белгиланмаган, бироқ келишув яқин кунларда имзоланиши эҳтимоли сақланиб қолмоқда.
“Бу эртага содир бўлмайди, аммо меморандумнинг яқин кунларда имзоланиши эҳтимолдан холи эмас. Бироқ қарама-қарши томоннинг беқарор позицияси сабабли эҳтиёткорлик билан ёндашишимиз керак”, деди Бақоий.
Унинг сўзларига кўра, меморандум ҳарбий ҳаракатларни тўхтатишга қаратилган бўлиб, ҳозирча Эроннинг ядро дастури масаласи муҳокама қилинмаяпти.
Эроннинг Ислом инқилоби қўриқчилари корпусига яқин бўлган Fars агентлиги Теҳрон меморандумнинг Дональд Трампнинг туғилган кунида имзоланишини АҚШнинг сиёсий-рамзий қадами сифатида кўраётгани, шу боис бундай сценарийга рози бўлмаслигини маълум қилди.
Агентлик манбаларига кўра, Эрон ҳукумати ҳали ҳужжатнинг сиёсий, ҳуқуқий ва техник жиҳатларини ўрганишда давом этмоқда ва якуний қарорни қабул қилмаган.
Аввалроқ Дональд Трамп АҚШ ва Эрон ўртасидаги келишув 13 ёки 14 июнь кунлари имзоланиши мумкинлигини айтган эди. Покистон бош вазири Шаҳбоз Шариф эса воситачилик қилаётган музокараларда тинчлик битимининг якуний матни келишиб олинганини ва электрон имзолашга тайёргарлик кўрилаётганини маълум қилган.
Шунингдек, Эрон Қўшма Штатлар билан имзоланиши кутилаётган ўзаро англашув меморандуми лойиҳасининг 14 та бандини маълум қилган эди.
