Туркия Суперлигасининг 29-туридан ўрин олган “Башакшеҳир” ҳамда “Генчлербирлиги” жамоалари ўртасидаги баҳс якунига етди. Истанбулдаги “Фотиҳ Терим” стадионида кечган учрашувда мезбонлар йирик ҳисобда ғалаба қозонди — 3:0.
Ўзбекистон миллий терма жамоаси сардори Элдор Шомуродов учрашувни асосий таркибда бошлади ва ўйин қаҳрамонига айланди. Элдор 9-дақиқадаёқ ҳисобни очган бўлса, 40-дақиқада ўзининг иккинчи голини уриб, орадаги фарқни оширди. Шу тариқа, ўзбекистонлик ҳужумчининг 6 ўйиндан иборат голсиз сериясига чек қўйилди. Майдон эгаларининг яна бир голига 42-дақиқада Бертуғ Йилдирим муаллифлик қилди.
Элдор Шомуродов 81 дақиқа давомида майдонда ҳаракат қилди ва ўрнини Давие Зелькега бўшатиб берди. Ўйиндаги самарали ҳаракатлари учун Элдор 8.6 балл билан учрашувнинг энг яхши футболчиларидан бири деб топилди. Яна бир ўзбекистонлик легионер Аббосбек Файзуллаев ушбу учрашув қайдномасига киритилмади.
Ушбу ғалабадан сўнг “Башакшеҳир” очколарини 47 тага етказиб олди. Жамоа турнир жадвалининг юқори қисмидаги ўрнини мустаҳкамлашда давом этмоқда.
Туркия Суперлигаси
29-тур
“Башакшеҳир” — “Генчлербирлиги” 3:0
Голлар: 1:0 – Шомуродов (9), 2:0 – Шомуродов (40), 3:0 – Йилдирим (42).
