FIFA президенти Жанни Инфантинонинг 2025 йилдаги иш ҳақи солиқлар чегирилгунига қадар 4,8 миллион швейсария франкини (тахминан 5,2 миллион евро) ташкил этди. Бу ҳақда ташкилотнинг 30 апрель куни Ванкуверда бўлиб ўтадиган конгресси учун тайёрланган расмий ҳужжатларида маълум қилинган.
Инфантинонинг жами даромади 2,6 миллион франк миқдоридаги асосий маош ҳамда 2,2 миллион франк (2,38 млн евро) миқдоридаги бонуслардан шаклланган. Қайд этиш жоизки, 2024 йилда президентнинг умумий даромади 4,25 миллион франкни (4,6 млн евро) ташкил этган эди, яъни бир йил ичида унинг маоши сезиларли даражада ошган.
Шунингдек, ҳужжатларда бошқа раҳбарларнинг ҳам даромадлари очиқланган. FIFA бош котиби Маттиас Графстрём солиқларгача 2,4 миллион франк (2,6 млн евро) ишлаб топган бўлса, ташкилот вице-президентларига 300 минг доллар, кенгаш аъзоларига эса 250 минг доллардан йиллик компенсация тўланган. Айрим кенгаш аъзолари ушбу тўловлардан ихтиёрий равишда тўлиқ ёки қисман воз кечишгани таъкидланган.
Маълумот учун, 56 ёшли Жанни Инфантино 2016 йилда Йозеф Блаттер лавозимидан муддатидан олдин кетганидан сўнг FIFA раҳбарлигига келган эди. Швейцария ва Италия фуқаролигига эга бўлган функционер 2019 ва 2023 йилларда қайта сайланган. Унгача эса у 2009-йилдан буён УЕФА бош котиби лавозимида фаолият юритиб келган.
