АҚШ президенти Дональд Трамп Эрон билан урушни тўхтатиш бўйича музокаралар муваффақиятсизликка учраса, Эроннинг муҳим энергетика ва нефть инфратузилмасига, жумладан, Харг оролига зарба бериш билан таҳдид қилди.
Агар қандайдир сабабга кўра яқин орада келишувга эришилмаса, эҳтимол шундай бўлади ва Ҳормуз бўғози зудлик билан “бизнес учун очилмаса”, биз Эрондаги мавжудлигимизни уларнинг барча электр станциялари, нефть қудуқлари ва Харг оролини (эҳтимол, барча сувни чучуклаштириш иншоотларини!) портлатиб, бутунлай йўқ қилиш билан якунлаймиз, биз уларга атайлаб тегмаганмиз, деб ёзди Трамп Truth Social ижтимоий тармоғида.
Трампнинг айтишича, АҚШ Теҳрондаги “янги ва ақллироқ режим билан” жиддий музокаралар олиб бормоқда ва аллақачон сезиларли натижаларга эришилган.
Аввалроқ у журналистларга Эрон воситачилар орқали етказилган АҚШ талабларининг кўпчилигига рози бўлганини ҳам айтганди.
Трамп Эрон нефтини қўлга киритмоқчи
29 март куни АҚШ президенти Financial Times газетасига берган интервьюсида Эрон нефть саноати устидан назорат ўрнатишни хоҳлашини, бундай қадам Эрон нефтининг катта қисми экспорт қилинадиган Харг оролини эгаллаб олишни назарда тутишини айтди.
Балки, Харг оролини олармиз, балки йўқ. Бизда кўплаб вариантлар бор. Бу, шунингдек, у ерда бир муддат қолишимизга тўғри келишини ҳам англатади, деган у.
Трамп Эрон Харг оролини мудофаа қилмаётган бўлиши мумкинлигини маълум қилган.
Менимча, уларда ҳеч қандай мудофаа йўқ. Уни жуда осонлик билан эгаллаб оламиз, дея таъкидлаган у.
Форс кўрфазида жойлашган, узунлиги қарийб 8 километр бўлган Харг ороли Эрон учун муҳим нефть маркази ҳисобланади. Мамлакат нефть экспортининг қарийб 90 фоизи шу орол орқали амалга оширилади. Урушнинг дастлабки икки ҳафтасида орол АҚШ—Исроил ҳужумларидан деярли четда қолганди.
Бироқ ўтган ҳафта АҚШ оролдаги ҳарбий иншоотларни бомбардимон қилди, нефть экспорт қилинадиган объектлар ҳужумга учрамади. Трамп агар Эрон ёки бошқа давлатлар кемаларнинг Ҳормуз бўғозидан хавфсиз ўтишига “қандайдир тарзда халақит берса”, нефть объектлари ҳужумга учрашини айтган.
