“Манчестер Сити” ярим ҳимоячиси Родри келажакда Мадриднинг “Реал” клубига ўтиши мумкинлиги ҳақидаги саволларга жавоб берар экан, ўтмишда “Атлетико” сафида тўп сургани бунга тўсқинлик қилмаслигини таъкидлади.
“Менинг ‘Атлетико’да ўйнаганим ‘Реал’да тўп суриш вариантини кўриб чиқишимга халақит бермайди. Дунёнинг энг яхши клубларига рад жавобини бериб бўлмайди. ‘Сантяго Бернабеу’да доим ўзгача муҳит ҳукмрон. Мен Ла Лигага қайтишни истардим — чемпионатни ҳамон кузатиб бораман. Англия Премьер Лига ҳам менга ёқади, турнир жуда қийин, лекин ҳозир у ердаги ўйинимдан мамнунман. ‘Манчестер Сити’ билан шартномам тугашига бир йил қолди. Вақти келади, музокаралар столига ўтирамиз ва гаплашиб оламиз”, дейди Родри.
29 ёшли футболчи жорий мавсумда барча турнирлар доирасида 28 та ўйинда майдонга тушиб, 2 та гол уришга эришди. Родри 2019 йилдан буён “Манчестер Сити” шарафини ҳимоя қилиб келмоқда. У “шаҳарликлар” сафига “Атлетико”дан келиб қўшилган. Футболчининг клуб билан амалдаги келишуви 2027 йил 30 июнгача мўлжалланган. Transfermarkt портали маълумотларига кўра, футболчининг бозор қиймати 65 миллион еврони ташкил этади.
