Украина аҳолиси 2025 йилга келиб 20 миллион кишигача камайди. 2014 йилда мамлакатда 40 миллиондан ортиқ киши истиқомат қилган. Бу ҳақда Британиянинг Nеw Statesman журнали муҳаррири Уилл Ллойд маълум қилди.
“Бир британиялик амалдорнинг менга айтишича, 2014 йилда 40 миллиондан сал кўпроқ деб баҳоланган Украина аҳолиси 2025 йилга келиб тахминан 20 миллионгача камайган. Бу кўрсаткич очиқ манбаларда эълон қилинган аксарият маълумотлардан анча паст”, деб ёзди Ллойд X ижтимоий тармоғидаги саҳифасида.
Шунингдек, у Украинага илк бор 2024 йилда келганини ва ўшандан бери Европанинг Украинадаги можарога қизиқиши сўниб, эътибор Ғазо сектори, Гренландия, Венесуэла ва Эронга қаратилаётганига гувоҳ бўлаётганини таъкидлаган.
“Дунёда тартибсизлик ҳукм сурар, замонавий ҳаво ҳужумидан мудофаа тизимлари учун тугаб бораётган қимматбаҳо ўқ-дорилар Киевдан тортиб Тель Авив ҳамда Абу Дабигача — ҳамма ерда зарур эди. Украина энди газеталарнинг биринчи саҳифаларидан ўрин олмаётганди”, дея қайд этган Ллойд.
Украина 1991 йилда мустақилликка эришганидан буён жиддий демографик муаммоларни бошдан кечирмоқда. Мамлакатда ҳар бир туғилган чақалоққа учта ўлим ҳолати тўғри келади. Украинада аҳолини рўйхатга олиш охирги марта 2001 йилда ўтказилган. Ўшанда мамлакат аҳолиси 48 миллион 457 минг кишини ташкил этган.
Forbes Ukraine ҳисоб-китобларига кўра, 2025 йилда Украина назоратидаги ҳудудда, тахминан, 30,5 миллион киши истиқомат қилмоқда.
БМТнинг Қочоқлар ишлари бўйича агентлиги маълумотларига кўра, 2025 йил 17 апрель ҳолатига кўра, бутун дунё бўйлаб Украинадан 6,918 миллион қочқин (Европада 6,358 миллион ва ундан ташқарида 0,56 миллион) қайд этилган.
