Ўрта вазн тоифасида собиқ UFC чемпиони Дрикус дю Плесси Ҳамзат Чимаев ва Шон Стрикленд ўртасида бўлиб ўтадиган чемпионлик жанги ҳақида ўз фикрларини билдирди.
Жанубий африкалик жангчи 9 май куни АҚШнинг Нью-Жерси штатида бўлиб ўтадиган UFC 328 турнири доирасидаги ушбу баҳсда Стрикленд ғалаба қозонишига ишонишини айтди.
“Ростини айтсам, Стрикленд бу жангда ғалаба қозонади деб ўйлайман. Бу жанг мантиқан тўғри, чунки Имавов ва Ҳамзат ўзаро жанг қилишни истамади. Мен Стрикленд билан жанг қилганман ва тик турган ҳолатда у Ҳамзатни мағлуб этади. Ҳамзат эса рақибининг ортига ўтиб олганида жуда хавфли бўлади. Буни кўп марта кўрганмиз. Бироқ Стрикленднинг фарқи шундаки, мен уни етти мартага яқин партерга йиқитганман, лекин уни пастда ушлаб туриш жуда қийин”, деди дю Плесси Boxing Talk YouTube каналига берган интервьюсида.
Маълумот учун, UFC’нинг ўрта вазн тоифаси (84 кг) чемпиони Ҳамзат Чимаев ўз камарини айнан Шон Стриклендга қарши ҳимоя қилади. Ушбу жанг 9 май куни АҚШнинг Нью-Жерси штати, Ньюарк шаҳрида ўтказиладиган UFC 328 турнири доирасида бўлиб ўтади.
Ҳамзат Чимаев 2025 йил 17 август куни Чикаго шаҳрида ташкил этилган UFC 319 турнирида айнан Дрикус дю Плесси устидан ғалаба қозониб, чемпионлик камарини қўлга киритган эди. Шу тариқа у UFC тарихида мағлубияциз чемпион бўлган 16-жангчига айланди.
Чимаев профессионал MMA фаолияти давомида 15 та жанг ўтказиб, уларнинг барчасида ғалаба қозонган. Шон Стрикленд эса 37 та жангда иштирок этиб, 30 та ғалаба ва 7 та мағлубият қайд этган. 35 ёшли америкалик жангчи ушбу вазн тоифасининг собиқ чемпиони ҳисобланади.
