Венесуэла давлат кончилик компанияси АҚШ бозорлари учун 1000 килогача олтин қуймаларини сотиш бўйича кўп миллион долларлик шартнома имзолади. Бу ҳақда Axios нашрининг вазиятдан хабардор манбаларига таяниб, Reuters хабар берди.
Келишувга кўра, Венесуэланинг Минервен кончилик компанияси
Trafigura
халқаро товар трейдерига 650 килодан 1000 килогача бўлган миқдорда олтин қуймаларини етказиб бериши лозим.
Trafigura
эса АҚШ ҳукумати билан алоҳида келишув асосида ушбу олтинларни қайта ишлаш заводларига жўнатади.
Оқ уй расмийси Reuters агентлигига берган баёнотида ушбу келишувни тасдиқлади. Маълум қилинишича, 4 март куни Венесуэлага ташриф буюрган АҚШ ички ишлар вазири Даг Бургум мазкур битимнинг имзоланишида бевосита ёрдам берган.
АҚШ расмийсининг таъкидлашича, ушбу стратегик келишув бевосита президент Дональд Трампнинг кўрсатмаси билан тайёрланган.
“
Trafigura
ва Венесуэла ўртасидаги ушбу тарихий олтин битими президент Трампнинг топшириғи билан ишлаб чиқилмоқда эди. Биз Венесуэлага ўз кончилик секторини қайта тиклашда ёрдам беряпмиз. Бу эса Америка саноатига биз учун зарур бўлган фойдали қазилмаларни олишга кўмаклашади”, деди Оқ уй вакили.
Ҳозирча келишувнинг аниқ молиявий шартлари ва бандлари бўйича батафсил маълумотлар очиқланмади.
