Исроил мудофаа вазири Исраэл Кац Эрон олий раҳнамоси Али Хоманаийнинг вафотидан кейин унинг ўрнини эгаллаши кутилаётган ҳар қандай янги етакчи Исроил учун нишонга айланишини маълум қилди. Бу ҳақда Anadolu хабар берди.
Кацнинг таъкидлашича, Эрон расмийлари томонидан тайинланадиган ҳар қандай янги раҳнамо, агар у муайян мақсадларни давом эттирса, йўқ қилинади. Вазир ушбу мақсадларни қуйидагича санаб ўтди:
- Исроилни йўқ қилиш режасини давом эттириш;
- АҚШ ва эркин дунёга таҳдид солиш;
- Эрон халқини зулм остида ушлаб туриш.
Мудофаа вазири бўлажак раҳбарнинг шахси, исми-шарифи ёки қаерда экани Исроил учун аҳамиятга эга эмаслигига урғу берди.
“Эрон режими томонидан тайинланадиган ҳар қандай етакчи Исроил учун тенг даражадаги нишон бўлади. Бош вазир Биньямин Нетаньяху ва мен Исроил ҳарбийларига ушбу вазифани бажариш учун барча мавжуд воситаларни тайёрлаш ва улардан фойдаланиш бўйича кўрсатма бердик”, деди Исраэл Кац.
Вазирнинг қўшимча қилишича, Исроил ўзининг америкалик иттифоқчилари билан биргаликда режимнинг салоҳиятини пасайтириш бўйича чораларни давом эттиради. Бу ҳаракатлардан кўзланган асосий мақсад — Эрон халқи томонидан режимни ағдариш ва ҳокимиятни ўзгартириш учун шароит яратишдир.
Айни пайтда баъзи ОАВ Эронда янги олий раҳнамо сайланганини эълон қилди. Германиянинг Deutsche Welle нашри ўз манбаларига таяниб хабар беришича, Али Хоманаийнинг ўғли — Мужтабо Хоманаий мамлакатнинг янги раҳбари этиб сайланган.
Мужтабо Хоманаийни сайлаш тўғрисидаги қарор 88 нафар нуфузли шиа уламоларидан иборат кенгаш томонидан қабул қилинган. Таъкидланишича, ушбу тайинлов Ислом инқилоби муҳофизлари корпусининг бевосита босими остида амалга оширилган.
