БААнинг Дубай шаҳрида жойлашган АҚШ консуллиги 3 март куни кечаси дрон ҳужумига учради. Оқибатда ҳудудда ёнғин келиб чиқди. Бу ҳақда The Guardian хабар берди.
Дубай ҳукумати ёнғинни бартараф этиб, ҳодиса оқибатида жабрланганлар йўқлигини қайд этди. Ушбу ҳодиса АҚШ ва Исроилнинг Эронга уюштираётган ҳарбий операцияси ва Теҳроннинг Яқин Шарқ давлатларидаги Америка базаларига жавоб зарбаси йўллаётган пайтга тўғри келди.
“Дубай ҳукумати АҚШ консуллиги автотураргоҳида дрон билан боғлиқ ҳодиса туфайли келиб чиққан ёнғин 45 дақиқада муваффақиятли ўчирилганини тасдиқлайди”, дейилади Дубай медиа идораси баёнотида.
Эроннинг ИРИБ давлат телерадиокомпанияси мазкур ҳужумни Эрон дрони амалга оширганини хабар қилди.
АҚШ элчихонаси Жидда, Ар Риёд ва Заҳрон шаҳарларидаги америкаликларни хавфсиз жойларда қолишга чақирди. Шунингдек, 3 март куни АҚШнинг Кувайтдаги элчихонаси ҳам “кейинги огоҳлантиришгача” ўз фаолиятини тўхтатишини эълон қилди.
АҚШ Давлат котиби Марко Рубио 3 март куни кечроқ берган баёнотида Давлат департаменти Яқин Шарқдаги америкаликларнинг минтақани тарк этишига ёрдам бериш устида ишлаётганини айтди.
“Биз чартер рейсларни, ҳарбий парвоз имкониятларини ва кенгайтирилган тижорий рейсларни (яъни кўпроқ ўриндиқли йирик самолётларни юбориш бўйича авиакомпаниялар билан ҳамкорликни) кўриб чиқдик ва бу жараённи давом эттирмоқдамиз”, деди Рубио Вашингтонда журналистларга.
Аввалроқ АҚШ Давлат департаменти барча фуқароларини зудлик билан Яқин Шарқдаги 14 та давлатни тарк этишга чақирганди.
