Украина президенти Владимир Зеленский 5 март куни мамлакат Яқин Шарқдаги можароларда қўлланилаётган Эроннинг Shahed дронларига қарши курашда АҚШ ва бошқа иттифоқчиларга ёрдам беришини маълум қилди. Бу ҳақда France 24 хабар берди.
АҚШ ва унинг Яқин Шарқдаги иттифоқчилари Эрон дронларига қандай қарши туриш бўйича Украина тажрибасига таянмоқда. Зеленскийнинг сўзларига кўра, сўнгги кунларда бир қатор давлатлар, жумладан, АҚШ ҳам Киевдан Эроннинг камикадзе дронларидан ҳимояланишда кўмак сўраган.
Президент сўнгги бир неча кун ичида Бирлашган Араб Амирликлари, Қатар, Баҳрайн, Иордания ва Кувайт раҳбарлари билан потенциал ҳамкорлик масалаларини муҳокама қилганини қўшимча қилди.
Украина мутахассислари минтақага юборилади
Шанба, 28 февраль куни АҚШ ва Исроил Эронга қарши кенг кўламли ҳаво ҳужумларини бошлаганидан сўнг Теҳрон жавоб тариқасида қўшни давлатлардаги Америка объектларига зарба бериб келмоқда. Россия билан тўрт йилдан бери давом этаётган уруш давомида Украина Москва томонидан фаол қўлланилаётган Shahed дронларини уриб туширишнинг юқори самарали усулларини ишлаб чиққан.
“Биз АҚШдан Яқин Шарқ минтақасини Shahed’лардан ҳимоя қилиш бўйича аниқ ёрдам сўралган мурожаат олдик. Мен зарур воситаларни тақдим этиш ҳамда талаб қилинадиган хавфсизликни кафолатлай оладиган украиналик мутахассислар иштирокини таъминлаш бўйича кўрсатма бердим”, деб ёзди Зеленский X ижтимоий тармоғида.
Вазиятдан хабардор манбага кўра, Вашингтон минтақадаги айрим мамлакатларда жойлашган ўз базалари ва аскарларини ҳимоя қилишда кўмак сўраган. Украиналик мутахассислар “яқин кунларда” иш бошлаши кутилмоқда.
АҚШ президенти Дональд Трамп 5 март куни Reuters агентлигига берган телефон орқали интервьюсида Зеленскийнинг таклифига муносабат билдирди. У Эрон дронларидан ҳимояланишда ҳар қандай давлатнинг ёрдамини қабул қилишга тайёрлигини билдирди.
Бироқ Зеленский ҳафталик баёнотида Эрондаги уруш узоқ ва шиддатли давом этса, Ғарб иттифоқчилари томонидан Украинага етказиб берилаётган қурол-яроғ, айниқса, Россия ракеталаридан ҳимояланиш учун зарур бўлган ҳаво мудофааси тизимлари камайиб кетишидан хавотир билдирди.
Сўнгги ойларда Украина Россиянинг баллистик ракеталарини уриб туширишга қодир ягона восита — АҚШда ишлаб чиқарилган Patriot тизимларининг тақчиллигини бошидан ўтказмоқда. Шу сабабли, 3 март куни Зеленский Украина ўзининг дрон-тўсқинлик воситаларини Яқин Шарқдаги иттифоқчилар ихтиёридаги Patriot ракеталарига айирбошлашга тайёрлигини маълум қилди.
