Исроил футбол ассоциацияси матбуот хизмати Эрон билан давом этаётган ҳарбий низо фонида мамлакат терма жамоаси ва клубларининг халқаро мусобақалардан четлатилиши мумкинлиги ҳақидаги хабарларга изоҳ берди. Бу ҳақда Sport24 нашри хабар бермоқда.
Журналистларнинг “FIFA ва УЕФА томонидан Исроил футболини халқаро турнирлардан четлатиш бўйича бирор-бир мурожаат бўлдими?” деган саволига ассоциация вакили қисқа ва қатъий жавоб берган:
“Йўқ. Ҳаммаси яхши бўлади. Биз бу масалада хавотир олаётганимиз йўқ”, дейди Исроил футбол расмийси.
Эслатиб ўтамиз, февраль ойи охирида АҚШ ва Исроилнинг Эронга қарши бошлаган ҳарбий операцияси минтақадаги вазиятни кескинлаштириб юборган эди. Бунга жавобан Эрон АҚШнинг Исроил, Қатар, БАА, Саудия Арабистони, Қувайт ва Баҳрайндаги ҳарбий базаларига зарбалар йўллаган. Мазкур геосиёсий таранглик фонида халқаро спорт жамоатчилиги FIFA ва УЕФА каби ташкилотлардан иштирокчи давлатларга нисбатан санкциялар қўллашни талаб қилмоқда.
Маълумот учун, ҳозирча FIFA ва УЕФА ушбу масалада расмий сукут сақламоқда. Ташкилотлар 2026-йилги Жаҳон чемпионати мезбонлиги ва Исроил клубларининг қитъа миқёсидаги турнирларда қатнашиш ҳуқуқи бўйича якуний қарорларини эълон қилмаган.
