Италияда ўтаётган 2026 йилги қишки Олимпия ўйинлари ташкилотчилари россиялик спортчиларни анъанавий совғалардан маҳрум қилди. ТАСС нашрининг хабар беришига кўра, Олимпия қишлоғига жойлашиш вақтида барча иштирокчиларга тарқатилган махсус смартфонлар россиялик спортчиларга берилмаган.
Маълум қилинишича, Халқаро олимпия қўмитасининг ҳомийси бўлган Жанубий Корея компанияси (Samsung) 2026 йилги ўйинлар учун эксклюзив дизайндаги смартфонларни тақдим этган. Компания матбуот хизмати ушбу қурилмалар Италияга келган қарийб 3 800 нафар спортчининг барчасига тарқатилишини маълум қилган бўлса-да, россияликлар бу рўйхатдан четда қолди.
Эслатиб ўтамиз, бир ярим йил аввал Парижда ўтган 2024-йилги ёзги Олимпиада ўйинларида ҳам россиялик спортчилар худди шу ишлаб чиқарувчининг телефонларини олмаган.
Маълумот учун, мусобақанинг 10-куни якунларига кўра, Норвегия терма жамоаси медаллар жамғаришда етакчилик қилмоқда — 12 та олтин, 7 та кумуш ва 8 та бронза. Турнир мезбони — Италия 8 та олтин, 4 та кумуш ва 10 та бронза билан иккинчи поғонани банд этган. 6 та олтин, 5 та кумуш ва 10 та бронза медалига эга Нидерландия кучли учликни якунлаб берган.
