Италияда ўтказилаётган 2026 йилги Олимпия ўйинларида 35 ёшли австралиялик сноубордчи, ўзининг тўртинчи қишки Олимпиадасида иштирок этаётган Кемерон Болтон сноуборд-крос бўйича машғулот вақтида жиддий жароҳат олди. Бу ҳақда Independent нашри хабар берди.
Болтон жароҳатни 10 февраль куни олган, бироқ бугун 11 февраль куни бўйнида кучли оғриқ ҳис қилган. Спортчи даволаниш учун вертолёт орқали Милан шаҳридаги шифохонага олиб кетилган. Рентген текшируви унинг бўйин қисмида иккита суяк синиши борлигини кўрсатган.
Жамоа раҳбари Алиса Кемплиннинг айтишича, Болтон жароҳатнинг оғирлигига қарамай руҳий жиҳатдан яхши ҳолатда ва унинг ёнида рафиқаси ҳам бўлган.
Болтон 2025 йилда Швейцариянинг Энгадин шаҳрида ўтказилган Жаҳон чемпионатида Миа Клифт билан бирга аралаш жамоавий дастурда кумуш медални қўлга киритган.
Австралия Олимпия қўмитаси сўнгги спортчи алмашинуви (Late Athlete Replacement) механизмини ишга туширганини эълон қилди — Олимпиадада илк бор иштирок этадиган Жеймс Жонстон жамоага қўшилди ва Адам Ламберт ҳамда Жарред Ҳьюс билан бирга сноуборд-крос дастурининг саралаш баҳсларида қатнашади.
Аввалроқ, америкалик 41 ёшли тоғ чанғичи Линдси Вонн мусобақа вақтида йиқилиб, жароҳат олгани хабар қилинган эди. Вонн тезлик билан тушиш мусобақасини 13-рақам остида бошлаган, 13-сонияда эса тўсинлардан бирига урилиб, мувозанатини йўқотган.
