Италиянинг Милан ва Кортина шаҳарларида ўтказилаётган 2026 йилги Қишки Олимпия ўйинларида Норвегия спортчилари умумжамоа рейтингида 7 та олтин, 2 та кумуш ва 5 та бронза медал билан етакчилик қилмоқда. Ушбу мамлакат қишки Олимпиада тарихида олтин медаллар ва умумий совринлар сони бўйича энг муваффақиятли давлат ҳисобланади (148 та олтин, 134 та кумуш ва 124 та бронза). Мамлакат Олимпия ўйинлари медалчилари учун алоҳида мукофот пули тақдим этмайди, бироқ йилига 17 734 АҚШ доллари миқдорида спорт стипендияси ажратади.
УСА Today маълумотларига кўра, ушбу Ўйинларда олимпиячиларга энг катта мукофот пули белгилаган давлат — Сингапур. Олтин медал учун спортчи қарийб 790 минг, кумуш учун 395 минг, бронза учун эса 197 минг АҚШ доллари олиши мумкин. Сингапур қишки Олимпиадаларда бой тарихга эга бўлмаса-да, мамлакат қишки спорт турларини ривожлантиришни рағбатлантириш мақсадида катта молиявий сармоя киритмоқда. Италиядаги Ўйинларда Сингапурдан фақат бир спортчи — тоғ чанғичиси Фаиз Баша иштирок этмоқда.
Хитойдан алоҳида қатнашадиган Гонконг ҳам шунга яқин мукофотларни таклиф қилади: олтин — 768 минг доллар, кумуш — 384 минг доллар, бронза — 192 минг доллар.
Европа давлатлари орасида мезбон Италия энг юқори кўрсаткичга эга. Италиялик спортчилар олтин медал учун 213 минг доллар, кумуш учун 106 минг доллар, бронза учун эса қарийб 71 минг доллар олади. Шу билан бирга, мамлакат спортчилари аллақачон 13 та медални қўлга киритгани боис, умумий харажат Осиё давлатлариникидан юқори бўлиши мумкин (ҳозиргача — 6 та олтин, 3 та кумуш, 7 та бронза).
АҚШ эса Оператион Голд дастурини давом эттирмоқда. Унга кўра, 2026 йилги Ўйинларда олтин медал учун 37,5 минг доллар, кумуш учун 22,5 минг доллар, бронза учун 15 минг доллар тўланади.
Шунингдек, Стевенс Финанcиал Security Аwардс дастурининг жорий этилиши сабабли АҚШ терма жамоасининг ҳар бир аъзоси натижасидан қатъи назар 200 минг доллар миқдорида молиявий қўллаб-қувватлов олади. Маблағнинг ярми биринчи Олимпиададаги иштирокидан 20 йил ўтгач ёки 45 ёшга тўлганда берилади, қолган ярми эса спортчи вафотидан сўнг оиласига суғурта тўлови сифатида ажратилади. Мазкур тизим собиқ олимпиячиларнинг спорт фаолияти тугаганидан кейин ҳам барқарор ҳаёт кечиришини таъминлашга қаратилган.
АҚШ делегацияси қишки Олимпиададаги энг йирик жамоа бўлиб, 233 нафар спортчи (118 эркак ва 115 аёл) дастурга киритилган барча спорт турларида иштирок этмоқда.
Маълумот учун, Париж Олимпиадасида ғолиб ва совриндор бўлган ўзбекистонлик спортчилар Президент қарорига мувофиқ, олтин медал учун 200 минг АҚШ доллари, кумуш медал учун 100 минг, бронза учун 50 минг доллари миқдоридаги пул мукофотлари билан тақдирланган.
Ўзбекистонлик мусобақа совриндорларига пул мукофотидан ташқари автомобиль совға қилиш ҳам анъанага айланган. Масалан, Токио Олимпиадаси совриндорларига Tahoe ҳамда Trailblazer автомобильи ҳам ҳадя қилинган эди.
Милан–Кортина-2026 қишки Олимпия ўйинларида ўзбекистонлик икки нафар спортчи Даниил Ейбог (шорт-трек) ҳамда Медет Назаров (тоғ чанғиси) иштирок этади.
