Каталониянинг “Барселона” клуби спорт директори Деку “кўк-анорранглилар” раҳбарияти қишки трансфер ойнасида таркибни кучайтириш имкониятини кўриб чиқмаётганини маълум қилди.
“Бугунги кунда мен жамоани кучайтириш учун футболчи сотиб олиш заруриятини кўрмаяпман. Олдинда ҳали кўп ўйинлар бор ва вазият ўзгариши ҳам мумкин. Ҳозирча ҳеч бир футболчи жамоани тарк этиш истагини билдирмади, шунинг учун янги футболчилар ҳақида ўйлаганимиз йўқ.
Агар вазият ўзгарадиган бўлса ёки чиндан ҳам эҳтиёж пайдо бўлса, биз кимнидир ўз сафимизга қўшиб олишга ҳаракат қиламиз. Мен аниқ номларни тилга олмоқчи эмасман, бироқ биз трансфер бозорини диққат билан кузатяпмиз”, дея Декунинг сўзларини келтиради Football Espana нашри.
Эслатиб ўтамиз, ҳозирда “Барселона” Ла Лига турнир жадвалида 22 очко билан иккинчи ўринни эгаллаб турибди. “Реал Мадрид” эса 24 очко жамғарган ҳолдан пешқадамлик қилмоқда. Каталонияликлар чемпионат доирасидаги навбатдаги турда айнан “Реал”га қарши майдонга тушади. Беллашув 26 октябрь, якшанба кунига белгиланган.
