Биткоин криптовалютасининг курси Тошкент вақти билан соат 01:55 да 62 345 долларгача тушди. Бу ҳақда Binance биржаси маълум қилди.
Бу 2025 йил октябридаги энг юқори кўрсаткичдан қарийб икки баравар паст. Ўша пайтда Binance биржасида биткоин нархи 126 199 долларга етган эди. Бир ҳафта ичида биткоин қарийб 20 фоизга арзонлашди. Илгари “рақамли олтин” деб қаралган ушбу активга инвесторлар ишончи кескин камаймоқда.
Deutsche Bank таҳлилчиси Марион Лабурнинг фикрича, биткоиннинг оммавий сотилиши анъанавий инвесторлар қизиқиши пасайганини ва криптовалюталарга нисбатан пессимизм кучаяётганини кўрсатади. Криптовалютанинг товар ва хизматлар учун тўлов воситаси сифатида қўлланиши ҳануз чекланган.
Биткоин курси январь ойининг ўрталаридан бошлаб пасаймоқда. Бу тенденция бозорлардаги беқарорлик ва геосиёсий таранглик билан боғлиқ. Аммо ноодатий жиҳати шундаки, олтин ва кумуш каби бошқа активлар қимматлашган бўлса ҳам, биткоин бу жараёнда ўсишни кўрсатмади. Сўнгги бир йил ичида унинг нархи қарийб 30 фоизга тушди, ҳолбуки шу даврда олтин 68 фоизга қимматлашди.
CоinShares компаниясининг тадқиқот бўлими раҳбари Жеймс Баттерфиллнинг айтишича, 70 минг доллар муҳим чегара бўлиб, уни ушлаб тура олмаслик биткоин нархининг 60–65 минг доллар оралиғигача тушиши эҳтимолини оширади.
Илгари биткоин нархини қўллаб-қувватлаб келган йирик институционал инвесторлар талаби ҳам сезиларли даражада камайди. Блокчейн маълумотларини таҳлил қилувчи CryptoQuant ҳисоботига кўра, йирик молиявий институтларнинг биткоинга бўлган қизиқиши кескин камайган. Хусусан, 2026-йилда АҚШдаги ETF фондлари биткоинни сотган, ҳолбуки ўтган йилнинг шу даврида улар 46 мингта биткоин сотиб олган эди.
CryptoQuant экспертлари хавотирли аломатни қайд этди: 2022 йил март ойидан бери биринчи марта биткоин нархи 365 кунлик ўртача кўрсаткичдан пастга тушди ва деярли уч ой ичида 23 фоизга пасайди. Бу 2022 йил бошидаги пасайишдан ҳам ёмонроқ. Мутахассислар биткоин нархи 60 минг долларга тушишини прогноз қилмоқда.
