Саудия Арабистонининг “Ал-Иттиҳод” клубида тўп сураётган франциялик ҳужумчи Карим Бензема клуб таклиф қилган янги шартнома шартлари сабаб жамоа сафида ўйнашдан бош тортмоқда. Бу ҳақда L’Equipe нашри хабар бермоқда.
Манбага кўра, Бензема ва Саудия клуби раҳбарияти ўртасидаги муносабатлар кутилмаганда кескинлашган. Жиддаликлар 38 ёшли футболчига амалдаги маошидан анча паст бўлган шартнома таклиф қилган. Бундан норози бўлган ҳужумчи клубнинг навбатдаги ўйинларига бойкот эълон қилмоқчи.
Каримнинг “Ал-Иттиҳод” билан шартномаси жорий йилнинг июнь ойида якунига етади. Қишки трансфер ойнаси ёпилишига беш кун қолганида клуб ҳужумчига янги шартнома таклиф қилди. Манбага кўра, ушбу таклиф Бензема атрофидагилар томонидан “ҳақоратли” дея баҳоланган. Таъкидланишича, шартнома шартлари футболчини деярли “бепул ўйнашга” мажбур қиларди, бунда унинг имиж ҳуқуқлари ҳисобга олинмаган. Foot Mercato нашрининг ёзишича, шундан сўнг Бензема “Ал-Иттиҳод” машғулотларига бормаган.
Карим Бензема 2023 йилдан буён “Ал-Иттиҳод” шарафини ҳимоя қилиб келмоқда. У жамоа билан 2025 йилда Саудия Арабистони чемпионлигини қўлга киритган.
Маълумот учун, Бензема фаолиятининг дастлабки йилларида Франциянинг “Лион” клубида ўйнаган ва жамоа билан тўрт бор мамлакат чемпионига айланган. Кейинчалик “Реал”га кўчиб ўтиб, 2009–2023 йиллар оралиғида “қироллик клуби” сафида 648 та учрашувда майдонга тушиб, 354 та гол урган. Бензема “Реал” билан бирга беш марта Чемпионлар Лигаси, тўрт марта Испания чемпионати ва уч марта Испания Кубогини қўлга киритган.
Бензема Франция миллий жамоаси сафида 2021 йилда Миллатлар Лигасида ғолиб чиқди, 2022 йилги Жаҳон чемпионатида эса кумуш медални қўлга киритди. Шунингдек, у 2022 йилда France Football талқинига кўра мавсумнинг энг яхши футболчисига бериладиган “Олтин тўп” мукофотига сазовор бўлган.
