FIFA президенти Жанни Инфантино ўзбек футболининг ривожи ва Ўзбекистон спортчиларининг сўнгги йиллардаги ютуқлари ҳақида видеомурожаат йўллади. Бу ҳақда “Дунё” ахборот агентлиги хабар берди.
“2016-йилда FIFA президенти лавозимига киришганимдан буён Ўзбекистонга бир неча бор ташриф буюрдим. Ҳар бир сафар мамлакатда ижтимоий-иқтисодий ривожланиш ва изчил модернизация жараёнлари давом этаётганини тасдиқлайди. Ўзбекистон 1994-йилда FIFAга аъзо бўлганидан буён футбол тизими стратегик режалаштириш, инфратузилмага сармоя киритиш ва футбол таълимини ривожлантириш орқали сезиларли даражада мустаҳкамланди”, дейди FIFA раҳбари.
Шунингдек, Инфантино президент Шавкат Мирзиёевнинг спортга қаратаётган эътиборини алоҳида қайд этди:
“Президент Шавкат Мирзиёев 2016-йилда ўз лавозимига киришганидан сўнг спорт ва футболни ривожлантиришга аниқ йўналиш берди. Миллий терма жамоанинг 2024-йилги ёзги Олимпиада ўйинларида иштирок этиши ёш футболчиларнинг салоҳиятини халқаро майдонда намойиш этишда муҳим аҳамият касб этди”, деди Инфантино.
Инфантино FIFA турнирларининг Ўзбекистонда ўтказилишини тарихий воқеа сифатида баҳолади:
“Ўзбекистонда футзал бўйича жаҳон чемпионатининг ўтказилиши тарихий воқеа бўлди. Мамлакат Марказий Осиёда биринчи бўлиб FIFA турнирига мезбонлик қилди. 2025 йил сентябрь ойида ташриф буюрган Олимпия шаҳарчаси Ўзбекистоннинг FIFAнинг янги турнирларини ўтказиш учун муносиб эканини кўрсатди. Буни Ўзбекистон ва Озарбайжоннинг 2027-йилда U-20 жаҳон чемпионатига биргаликда мезбонлик қилиши ҳам тасдиқлайди”, дейди FIFA президенти.
Эслатиб ўтамиз, аввалроқ Ўзбекистон ва Озарбайжон 2027-йилги U-20 Жаҳон чемпионатига мезбонлик қилиши ҳақида хабар берилган эди.
