Марокаш мезбонлик қилган Африка Миллатлар кубоги мусобақасидан сўнг FIFA миллий терма жамоалар рейтинги янгиланганини эълон қилди. Унга кўра, Ўзбекистон миллий терма жамоаси 1462,03 очко билан 52-ўринни эгаллади. “Оқ бўрилар” аввалги ойдаги ўрнига нисбатан икки поғона пастлади.
Фабио Каннаваро бошчилигидаги жамоа январь ойида йиғин ўтказмагани сабабли жамғарилган очколар сонида ўзгариш кузатилмади.
Айни пайтда Ўзбекистон терма жамоаси Осиёнинг энг кучли беш жамоаси қаторида қолмоқда. Ундан юқори ўринларда Япония (1650,12), Эрон (1617,02), Жанубий Корея (1599,45) ва Австралия (1574,01) жойлашган.
“Оқ бўрилар”нинг 2026 йилги Жаҳон чемпионати “К” гуруҳидаги рақибларидан Португалия 1760,38 очко билан 6-ўринда бормоқда, Колумбия (1701,30) эса 14-поғонада қайд этилган. Эҳтимолий рақиблар орасида энг яхши натижа Конго Демократик Республикасига тегишли бўлиб, жамоа 1468,22 очко билан 48-ўринни эгаллаб турибди. Шунингдек, Ямайка (1362,46) 70-ўринда, Янги Каледония эса 1042,62 очко билан 150-поғонада қолган.
Маълумот учун, ҳозирда FIFA рейтингида Испания етакчилик қилмоқда. Амалдаги Европа чемпионлари ҳисобида 1877,18 очко мавжуд. Амалдаги Жаҳон чемпиони Аргентина 1873,33 очко билан иккинчи ўринда бормоқда, кучли учликни эса Франция (1870 очко) якунлаб бермоқда.
Африка Миллатлар кубоги ғолиби Сенегал терма жамоаси 1706,83 очко билан 13-ўринга кўтарилган бўлса, вице-чемпион Марокаш уч поғона юқорилаб, 1736,57 очко билан 8-ўринда қайд этилди.
