Саудия Арабистонининг “Ан-Насср” клуби ҳамда Португалия терма жамоаси ҳужумчиси Криштиану Роналду “Викимедиа” фонди томонидан тақдим этилган рейтингда олтинчи ўринни банд этди. Мазкур фонд интернет-энциклопедия — “Википедия”га эгалик қилади. Рейтингга 2008 йилдан ҳозирги кунгача бўлган даврда энг кўп кўрилган 25 та саҳифа киритилган.
Рейтингга кўра, Роналдуга бағишланган “Википедия” саҳифаси 209 миллион мартадан ортиқ кўрилган бўлиб, бу умумий рўйхатда олтинчи натижа ҳисобланади. Шунингдек, аргентиналик футболчи Лионель Мессининг саҳифаси 169 миллион марта кўрилиб, 11-ўринни эгаллаган. Спортчилар орасида ушбу рейтингга фақат Роналду ва Месси киритилган.
“Википедия” тарихидаги энг кўп кўрилган саҳифалар:
- Йиллар бўйича вафот этганлар рўйхати — 647 млн 25 минг 321 марта
- АҚШ — 328 млн 501 минг 200 марта
- Дональд Трамп — 325 млн 397 минг 973 марта
- Елизавета II — 253 млн 385 минг 102 марта
- Ҳиндистон — 210 млн 779 минг 909 марта
- Криштиану Роналду — 209 млн 262 минг 818 марта
- Барак Обама — 200 млн 619 минг 72 марта
- Илон Маск — 197 млн 557 минг 694 марта
- Иккинчи жаҳон уруши — 196 млн 185 минг 39 марта
- Буюк Британия — 180 млн 986 минг 829 марта
- Лионель Месси — 169 млн 27 минг 752 марта
- Майкл Жексон — 168 млн 519 минг 508 марта
Маълумот учун, Криштиану Роналду 2025 йилнинг энг сердаромад спортчиси ҳисобланади. Португалиялик футболчи йил давомида 260 миллион АҚШ доллари миқдоридаги даромад билан барча спортчилар орасида биринчи ўринни эгаллаган. Аргентина терма жамоаси сардори Лионель Месси эса 130 миллион АҚШ доллари билан учинчи ўринда қайд этилган.
