“Манчестер Сити” ҳужумчиси Эрлинг Ҳоланд фаолиятини Испания Ла Лигасида давом эттириши мумкин. Sky Sport Germany нашри хабарига кўра, футболчига “Реал Мадрид” жиддий қизиқиш билдирмоқда.
Қайд этилишича, футболчининг ўзи ҳам Испания чемпионатига кўчиб ўтиш вариантини инкор этмаяпти. Ўз навбатида, “қироллик клуби” президенти Флорентино Перес ҳам 25 ёшли норвегиялик футболчини жамоага олиб келишдан манфаатдор. Перес эҳтимолий трансферни жорий мавсум якунида амалга оширмоқчи. Шу сабабдан клуб раҳбарияти Ҳоланднинг агенти билан алоқа ўрнатиб, трансфер юзасидан музокара ўтказган.
Аммо “Реал” ушбу трансферни амалга оширишда бир қатор жиддий муаммоларга дуч келиши мумкин: Ҳоланднинг “Манчестер Сити” билан шартномаси 2034-йилгача амал қилади, бу эса асосий тўсиқлардан бири ҳисобланади. Бундан ташқари, норвегиялик ҳужумчини харид қилиш учун мадридликлар бразилиялик вингер Винисиус Жуниор билан хайрлашиши лозим. Шунингдек, “қироллик клуби” Ҳоланд трансферини амалга ошириш учун 500 миллион евро атрофида сарфлаши керак. Мазкур ҳолатлар трансфернинг амалга ошиш эҳтимолини пасайтиради.
Маълумот учун, жорий мавсум Эрлинг Ҳоланд барча мусобақалар дориасида 29 та учрашувда майдонга тушиб, ўз ҳисобига 26 та гол ва 4 та голли узатма ёздириб қўйган. Transfermarkt порталига кўра, футболчининг бозор қиймати 200 миллион еврони ташкил этади.
