“Бенфика” бош мураббийи Жозе Моуриньо “Реал Мадрид”га қайтиши борасидаги саволларга жавоб қайтарди.
“Мени сериалларга аралаштирманг. Яхши сериаллар ҳам бўлади, аммо улар ҳаддан ташқари чўзилиб кетади: бир-икки қисмини ўтказиб юборсанг, кейин воқеалар ривожини тушунмай қоласан. Мени бунга аралаштирманг, чунки мен уларни томоша қилмайман”, — деди Моуриньо.
Аввалроқ “Реал Мадрид” клуби президенти Флорентино Перес жамоа бошқарувига яна португалиялик мутахассис Жозе Моуриньони тайинлаши мумкинлиги ҳақида хабарлар берилган эди.
Ҳозирда Моуриньо Португалиянинг “Бенфика” клуби бош мураббийи сифатида фаолият юритмоқда.
Маълумот учун, Жозе Моуриньо 62 ёшда. У 2010–2013 йиллар оралиғида “Реал Мадрид”ни бошқарган ва шу даврда жамоа билан Испания чемпионати, Кубоги ҳамда Суперкубогини қўлга киритган. Моуриньо бошчилигида “қироллик клуби” 178 та учрашув ўтказиб, 127 ғалаба, 28 дуранг ва 23 мағлубият қайд этган.
Шунингдек, “Реал” Моуриньо даврида “Барселона”га қарши ўтказилган 17 та “Эл-Класико”нинг 6 тасида ғалаба қозонган, 6 учрашув дуранг билан якунланган, 5 баҳсда эса “кўк-анорранглилар” устун келган.
2025 йил сентябрь ойида Моуриньо Туркиянинг “Фенербаҳче” клубини Чемпионлар Лигаси асосий босқичига олиб чиқа олмагани сабабли истеъфога чиқарилган. Шундан сўнг португалиялик мутахассис “Бенфика” бош мураббийи этиб тайинланган ва ҳозирда жамоа Португалия чемпионатида учинчи ўринни эгаллаб турибди.
