Эрон олий раҳнамоси Оятуллоҳ Али Хоманаий 17 декабрь куни чиқиш қилиб, мамлакатда юз берган норозилик намойишлари вақтида юзага келган қурбонлар учун бевосита АҚШ президенти Дональд Трамп айбдор эканини айтди. Бу ҳақда Al Arabiya хабар берди.
“Бу Америка фитнаси”
Диний байрам муносабати билан тарафдорлари олдида нутқ сўзлаган Али Хоманаий Вашингтонни Эрон миллатига қарши қаратилган ҳаракатларда айблади.
“Биз Америка президентини инсоний талафотлар, етказилган зарарлар ва у Эрон халқига нисбатан илгари сурган асоссиз айбловлар учун айбдор деб ҳисоблаймиз. Бу Америка фитнаси эди. Американинг мақсади — Эронни ютиб юбориш, мамлакатни яна ҳарбий, сиёсий ва иқтисодий жиҳатдан ўзига бўйсундиришдир. Биз АҚШ президентини қурбонлар, зарарлар ва Эрон миллатига қилган туҳматлари учун жиноятчи деб ҳисоблаймиз”, деди олий раҳнамо.
Мамлакатдаги диний раҳбариятга қарши қаратилган кенг кўламли норозилик тўлқинидан сўнг, Хоманаий расмийларни исёнчиларнинг “белини синдиришга” чақирди. У ўз нутқида ҳам ички, ҳам ташқи “жиноятчилар”га нисбатан қатъий чоралар кўрилишини таъкидлади.
“Биз мамлакатни урушга бошламоқчи эмасмиз, лекин ички жиноятчиларга шафқат қилмаймиз. Ички жиноятчилардан ҳам баттарроқ бўлган халқаро жиноятчиларга ҳам раҳм қилмаймиз. Аллоҳнинг марҳамати билан Эрон халқи худди фитнани йўқ қилгани каби, исёнчиларнинг ҳам белини букиб қўйиши керак”, дея қўшимча қилди у.
Энг йирик норозилик тўлқини
Эрон сўнгги уч йилдан ортиқ вақт ичидаги энг йирик намойишлар марказида қолмоқда. Иқтисодий қийинчиликлар ортидан 2025 йил 28 декабрь куни бошланган норозиликлар тезда сиёсий тус олиб, Ислом Республикаси тузумига қарши намойишларга айланиб кетди.
Инсон ҳуқуқлари ташкилотларининг таъкидлашича, ҳукумат намойишларни куч билан бостириши ва мамлакатда интернет ўчириб қўйилиши оқибатида минглаб одамлар ҳалок бўлган. Эрон расмийлари эса бу намойишларни тартибсизликлар ва “террорчилик операциялари” деб атаб, уларни ташкил этишда АҚШ ва Исроилни айблаб келмоқда.
