АҚШ президенти Дональд Трампнинг Гренландияни қўлга киритиш борасидаги таҳдидлари фонида Франция ва Германия бошқа Европа давлатлари қатори оролга ўз қўшинларини юборишини маълум қилди. Бу ҳақда France 24 хабар берди.
Германия Мудофаа вазирлигининг билдиришича, Бундесвернинг 13 кишилик разведка гуруҳи 15 январдан бошлаб Гренландия пойтахти Нуук шаҳрига йўл олади. Ушбу миссия Дания ҳукуматининг таклифига биноан амалга оширилмоқда.
“Минтақа хавфсизлигини таъминлаш йўлида”
Берлин расмий баёнотига кўра, миссиядан кўзланган мақсад — минтақа хавфсизлигини таъминлашда Данияни қўллаб-қувватлаш учун эҳтимолий ҳарбий ёрдам кўрсатиш шарт-шароитларини ўрганишдан иборат.
Европа Иттифоқининг ягона ядровий давлати бўлмиш Франция ҳам Гренландияга ўз ҳарбийларини юборишини тасдиқлади. Бу қарор Вашингтонда АҚШ, Дания ва Гренландия расмийлари ўртасида ўтган ўта муҳим учрашувдан сўнг эълон қилинди.
Трампнинг “Гренландия орзуси”
Трамп Даниянинг автоном ҳудуди ҳисобланган Гренландия АҚШ хавфсизлиги учун ҳаётий муҳим эканини таъкидлаб, уни ўз назоратига олишга бир неча бор ваъда берган эди. Чоршанба, 14 январь куни АҚШ вице-президенти Жей Ди Венс ва давлат котиби Марко Рубио билан учрашган Дания ташқи ишлар вазири Ларс Локке Расмуссен вазиятга қуйидагича муносабат билдирди:
“Трампнинг Гренландияни забт этиш истаги борлиги аниқ кўриниб турибди. Аммо биз Дания таркибида қоламиз”, деди вазир.
Трамп сўнгги ҳафталарда стратегик жиҳатдан қулай жойлашган ва минералларга бой Гренландия Россия ёки Хитой томонидан эгаллаб олинишининг олдини олиш учун АҚШга тегишли бўлиши шартлигини таъкидлаб келмоқда. У ҳудудни қўлга киритиш учун барча вариантлар тайёр эканини айтган, бу эса Европа ва АҚШ ўртасидаги муносабатларни кескин совуқлаштирди.
Бундан олдин Швеция ва Норвегия ҳам оролга ўз ҳарбий хизматчиларини юбориши ҳақида эълон қилган эди. Айни пайтда, Гренландия расмийси орол Данияни танлашини айтиб, АҚШ уни бошқармаслигини таъкидлаган.
