Мадриднинг “Реал” клуби ҳужумчиси Винисиус Жуниор бош мураббий Хаби Алонсо билан боғлиқ вазият ойдинлашмагунча шартномасини узайтирмаган. Бу ҳақда инсайдер Фабрицио Романо маълум қилган.
Манбага кўра, мураббий ва футболчи ўртасидаги ёмон муносабатлар 2025 йил 26 октябрь куни Ла Лиганинг 10-туридан ўрин олган “Барселона”га қарши ўйинда (2:1) пайтида бошланган. Бразилиялик футболчи 72-дақиқасида алмаштирилгач, Хаби Алонсога кескин эътироз билдирган. Майдон четидаги техник зонада Родриго майдонга тушишга тайёрланар экан, Винисиус бунга ҳайрон бўлган. Романо таъкидлашича, ўша учрашувдаги ҳолат ортидан футболчи клуб билан музокараларни тўхтатган.
Хаби Алонсо кейинчалик Винисиус билан муносабатларни яхшилашга ҳаракат қилган. Бироқ Винисиус янги шартнома масаласида шошилмаган ва мураббий билан боғлиқ қарор қандай бўлишини кутишини билдирган.
Эслатиб ўтамиз, 12 январь, душанба куни “қироллик клуби” Хаби Алонсони бош мураббийлик лавозимидан озод этиб, унинг ўрнига Альваро Арбелоани тайинлаганини эълон қилди. Алонсо 2025 йил ёзидан буён жамоани бошқариб келган. Унинг қўл остида “Реал” барча мусобақаларда 34 та учрашув ўтказиб, 24 ғалаба, 4 дуранг ва 6 мағлубият қайд этган. Ушбу даврда жамоа сафида энг кўп майдонга тушган футболчилар Арда Гюлер (34 ўйин), Винисиус Жуниор (33), Тибо Куртуа ва Орелиэн Чуамени (32 тадан) бўлган.
