АҚШ Марказий разведка бошқармаси (МРБ) декабрь ойи бошида Венесуэла соҳилидаги порт иншоотига дрон орқали ҳужум уюштирди. Бу АҚШнинг Венесуэла ичидаги нишонга илк зарба беришидир. Бу ҳақда вазиятдан хабардор манбаларга таяниб, CNN хабар берди.
Маълум қилинишича, дрон ҳужуми Венесуэла соҳилидаги чекка кема тўхташ жойи нишонга олган. АҚШ ҳукуматининг билдиришича, ушбу объектдан Венесуэланинг Трен де Арагуа жиноий гуруҳи гиёҳванд моддаларни сақлаш ва уларни кейинчалик кемаларга юклаб жўнатиш учун фойдаланган.
Зарба берилган вақтда иншоотда ҳеч ким бўлмаган, шу сабабли қурбонлар қайд этилмаган. Манбалардан бирининг сўзларига кўра, операция натижасида иншоот ва ундаги қайиқлар йўқ қилинган, бироқ бу кўпроқ рамзий маънога эга. Чунки бундай тўхташ жойлари (док) мамлакатда жуда кўп ва ушбу ҳужум ҳатто Венесуэла ичида ҳам деярли эътиборни тортмаган.
АҚШ расмийларининг муносабати
Президент Дональд Трамп ўтган ҳафта берган интервьюсида ушбу ҳужумни илк бор тан олган бўлса-да, тафсилотларни очиқламаган эди. У кеча, 29 декабрь куни журналистларнинг саволларига жавоб берар экан, АҚШ “кемалар гиёҳванд моддалар билан юкланадиган док ҳудудига” зарба берганини тасдиқлади.
Бироқ у операция ҳарбийлар ёки разведка томонидан амалга оширилганига аниқлик киритишдан бош тортган.“Биз халқаро сувларда қайиқларга зарба бердик, энди эса ўша ҳудуднинг ўзини ношонга олдик. Бу юклаш зонаси эди ва у энди йўқ”, деди Трамп.
Зиддиятли баёнотлар
Икки манбанинг таъкидлашича, операцияни разведка маълумотлари билан АҚШ Махсус операциялар кучлари қўллаб-қувватлаган. Аммо АҚШ Махсус операциялар қўмондонлиги матбуот котиби, полковник Алли Вайскопф буни рад этиб, ушбу операцияда иштирок этмаганликларини билдирган. МРБ мазкур ҳолат юзасидан изоҳ беришдан бош тортган. Оқ уй ва Венесуэла ҳукуматидан ҳам ҳозирча расмий муносабат билдирилмаган.
Вазиятнинг кескинлашиши
Ушбу зарба АҚШ ва Венесуэла президенти Николас Мадуро ўртасидаги кескинликни сезиларли даражада ошириши айтилмоқда. Бунгача АҚШ Кариб денгизи ва Тинч океанининг шарқий қисмида гиёҳванд моддалар ташишда гумонланган 30 дан ортиқ кемани йўқ қилган эди. Аммо бу зарбалар халқаро сувларда амалга оширилган. Венесуэла ҳудуди ичида ҳужум уюштириш эса — янги босқичдир.
Маълумотларга кўра, 2025 йил бошида Трамп МРБнинг Лотин Америкасида, жумладан Венесуэлада операциялар ўтказиш ваколатларини кенгайтирган. Аввалроқ АҚШ ҳарбийлари фақат денгиздаги контрабандачиларга зарба бериш ҳуқуқига эга эди.
“Яримшарнинг Ал-Қоидаси”
Оқ уй маъмурияти ушбу кампанияни гиёҳвандликка қарши кураш билан изоҳламоқда. Бироқ Трампнинг аппарат раҳбари Сюзи Уайлс интервьюларидан бирида кема зарбаларидан мақсад Мадурони таслим бўлишга мажбурлаш эканлигини шама қилган. АҚШ Мудофаа вазири Пит Хегсет наркобаронларни террорчиларга қиёслаган:
Бу наркотеррорчилар бизнинг ярим шарнинг “Ал-Қоида”сидир. Биз уларни худди “Ал-Қоида”ни овлагандек, худди шундай маҳорат ва аниқлик билан овлаяпмиз.
