Аргентина терма жамоаси собиқ ҳужумчиси Диэго Марадонанинг либоси Matchday Football Auctions аукционида 152 минг еврога сотилди. Либоснинг ўзи 123 минг еврога баҳоланган бўлса-да, 23 фоизлик комиссия қўшилгач, унинг якуний нархи 152 минг еврони ташкил этди. Ушбу футболка аукционларда сотилган Марадонанинг клуб футболкалари орасида энг қиммати бўлди.
Марадона ушбу футболкада 1984 йил Испания Кубоги финалида “Барселона” сафида майдонга тушган. Ўша учрашувда каталонияликлар Бильбаонинг “Атлетик” клубига 0:1 ҳисобида имкониятни бой берган. Ўйин якунидан сўнг майдонда оммавий жанжал келиб чиққан ва айнан шу пайтда Марадонанинг футболкаси йиртилиб кетган. Кейинчалик кийимларни ювиш учун йиғиб юрган клуб ходимаси кийим алмаштириш хонасида ушбу либосни топиб олган. Уни тиклашнинг иложи бўлмагач, аёл футболкани эсдалик сифатида сақлаб қолган. Йиллар ўтиб, у футболкани таниш бир эркакка совға қилган, кейинчалик эса у мерос тариқасида унинг ўғлига ўтган ва айнан шу шахс футболкани аукционга қўйган.
Диэго Марадона 2020-йилда 60 ёшида вафот этган. У 1986 йилги Жаҳон чемпиони, “Барселона” сафида Испания Кубоги ва Суперкубоги соҳиби бўлган. Шунингдек, Италиянинг “Наполи” клуби билан икки карра Италия чемпиони, мамлакат Кубоги ва Суперкубоги ҳамда УЕФА Кубогини қўлга киритган.
