АҚШ президенти Дональд Трамп санкциялар остидаги барча нефть танкерларининг Венесуэлага кириши ва ундан чиқишига “тўлиқ ва мутлақ” блокада жорий этишни буюрди.
Президентнинг бу баёноти АҚШ санкция остидаги нефть танкерини Венесуэла қирғоқларида қўлга олишидан бир ҳафта ўтиб янгради. Бундан ташқари, АҚШ гиёҳванд моддалар контрабандасига қарши операция доирасида қирғоқлар яқинига катта миқдорда ҳарбий кучларини жойлаштирган.“Венесуэла Жанубий Америка тарихидаги энг йирик Armada (ҳарбий флот) томонидан бутунлай ўраб олинган...Бизнинг бойликларимизни ўғирлагани ва бошқа кўплаб сабаблар, жумладан, терроризм, гиёҳванд моддалар контрабандаси ва одам савдоси учун Венесуэла режими хорижий террористик ташкилот деб эълон қилинди.
Шу боис мен Венесуэлага кириб-чиқаётган барча санкцияланган нефть танкерларини тўлиқ ва бутунлай блокада қилишни буюраман”, деб ёзди Трамп ўзининг Truth Social саҳифасида.
АҚШ ҳарбийлари сентябрь ойидан бери Венесуэла яқинидаги Тинч океанининг шарқий қисми ва Кариб денгизида ўнлаб кемаларга ҳужум қилиб, камида 90 кишини ўлдирди. Бу ҳаракатлар халқаро ҳуқуқ экспертлари томонидан “суддан ташқари қотиллик” сифатида танқид қилинди. Вашингтон кемаларни гиёҳванд моддалар савдоси билан шуғулланганликда айблади, аммо ўз даъволарини тасдиқлаш учун ҳеч қандай далил келтирмади.
Венесуэла узоқ вақтдан бери АҚШ ҳарбийларининг минтақага жойлаштирилишини “Венесуэланинг улкан нефть ва газ бойликларини эгаллашга уриниш”, дея баҳолаб келади.
Дунёдаги энг катта тасдиқланган нефть захираларига эга бўлишига қарамай, Венесуэла Трампнинг илк президентлиги даврида жорий этилган АҚШ санкциялари сабабли сўнгги йилларда экспорт бўйича кескин чекловларга дуч келган.
