Бирлашган Араб Амирликларининг Дубай шаҳри мезбонлик қилган ва Халқаро бокс ассоциацияси (IBA) томонидан ташкил этилган Жаҳон чемпионати -60 кг вазн тоифасида россиялик боксчи Всеволод Шумков олтин медални қўлга киритди. Финал жангида у 2024-йилги Олимпия ўйинлари чемпиони, ўзбекистонлик Абдумалик Ҳалоковни мағлуб этди. Жанг давомида Шумков рақибининг қулоғини тишлаб олгани билан боғлиқ ҳолат қайд этилган эди.
Шумков россиялик журналистнинг “Жаҳон чемпионати финалида унинг Майк Тайсон услубидаги ҳаракатларини қандай изоҳлайсиз?” деган саволига жавобан бу ҳолат жанг натижасига таъсир қилмаганини таъкидлади.
“Ростини айтсам, мен Жаҳон чемпионати олтин медали учун узоқ вақт интилиб келдим. Айнан шу рақибим билан тўрт марта тўқнаш келганман. Афсуски, муҳим турнирларда унга мағлуб бўлган эдим. Энди эса Жаҳон чемпионати финали. Мен барча имкониятларимни ишга солиб, чемпион бўлишга ҳаракат қилдим. Эҳтимол, бу ҳолат мени бир оз ҳаяжонга солиб юборди. Аслида бу ҳақиқий тишлаш ҳам эмас, шунчаки унинг қулоғи бир оз тирналди, лекин бунинг ҳеч қандай жиддий томони йўқ”, деди Шумков.
Шунингдек, россиялик боксчи иккинчи ва учинчи раундларда аниқ ғалаба қозонганини, бу “кичик ҳодиса” жанг натижасига таъсир қилмаганини айтиб ўтди.
Аввалроқ, Халқаро бокс ассоциацияси (IBA) президенти Умар Кремльёв Жаҳон чемпионати финалида юз берган можароли ҳолат — қулоқ тишлаш эпизоди бўйича ташкилотнинг тиббий ва интизомий комиссиялари масалани кўриб чиқишини маълум қилган эди.
Маълумот учун, Ҳалоков ва Шумков 2021 йил Белград шаҳрида ўтказилган Жаҳон чемпионати чорак финалида ўзаро тўқнаш келган ва унда ўзбекистонлик боксчи ғалаба қозонган эди.
