Аргентина терма жамоаси сардори Лионель Месси АҚШ, Мексика ва Канада майдонларида бўлиб ўтадиган 2026-йилги Жаҳон чемпионати олдидан турнирнинг асосий фаворитлари ҳақида гапирди. Бу ҳақда АS нашри хабар берди.
Мессининг айтишича, мусобақада бир нечта кучли жамоалар бор, аммо ғолиблик учун кураш олиб борадиганлар номи ўзгармаган. Ҳужумчи Аргентинани фаворитлар қаторига қўшди, бироқ Криштиану Роналду бошчилигидаги Португалияни рўйхатга киритмади:
“Чемпионликка даъвогарлардан бири — узоқ йиллардан буён соврин ютмаган Испания. Франция, Англия ва Бразилия ҳам ғалаба учун курашади. Ҳар доим Аргентинани асосий рақобатчиси сифатида кўрадиган Германия 2022-йилги мундиалдан кейин буни янада кўпроқ хоҳлайди. Турнир жуда оғир бўлади, лекин улар чемпионлик учун курашишига ҳеч қандай шубҳам йўқ”, деди Месси.
Маълумот учун, қуръа натижаларига кўра, Аргентина “J” гуруҳидан жой олди. Уларга Австрия, Иордания ва Жазоир каби терма жамоалар рақиблик қилади. Португалия эса Колумбия, Ўзбекистон ҳамда плей-офф ғолиби (Конго/Янги Каледония/Ямайка) билан бирга “К” гуруҳидан жой олди.
