Ирландия, Испания, Нидерландия ва Словения 2026 йилда ўтказилиши режалаштирилган “Евровидение” қўшиқ танловини бойкот қилишини маълум қилди. Бунга яҳудий давлатининг танловда иштирок этишига рухсат берилгани сабаб бўлди. Бу ҳақда BBC хабар берди.
Мамлакатлар Ғазодаги уруш ҳамда Исроилга нисбатан адолатсиз овоз бериш бўйича билдирилган айбловлар сабабли бу давлатни танловдан четлаштиришга чақирмоқда. Хусусан, Испаниянинг RTVE телерадиокомпанияси Женевадаги йиғилишда бу масала бўйича яширин овоз беришни ўтказишга чақирган етакчи ташкилотлардан бири бўлди. Компания ташкилотчилар бу сўровни рад этганини билдирган. RTVE’нинг таъкидлашича, Исроилнинг танловда иштирок этиши “фестивал ташкилотчиларига бўлган ишончсизликни оширди”.
Маълумот учун, Испания Франция, Германия, Италия ва Буюк Британия билан бирга “Евровидение”нинг “Катта бешлик” давлатлари қаторига киради. Ушбу давлатлар танловга энг катта молиявий ҳисса қўшгани сабабли, уларнинг ижрочилари тўғридан-тўғри финалга чиқади.
Ирландиянинг RТЕ телеканали Исроилнинг иштирокига нисбатан ўз позициясини қуйидагича ифодалаган:
“Ғазода одамлар ҳалок бўлаётгани ва кўплаб тинч аҳоли ҳаётини хавф остига қўйишда давом этаётган гуманитар инқирозни ҳисобга олсак, бизнинг иштирокимиз муносиб эмас деб ҳисоблаймиз”.
Исроил президенти Исаак Герцог эса ўз мамлакатининг танловда иштирок этишга рухсат берилганини юқори баҳолаган У буни “бирдамлик, биродарлик ва ҳамкорликнинг қадрлангани, Исроилни жим қилишга уринаётганлар ва нафрат тарқатувчилар устидан қозонилган ғалаба” деб атаган.
“Танлов маданият, шеърият ва халқлар ўртасидаги дўстликни муқаддас биладиган мусобақа бўлиб қолишига умид қиламан”, деган Исаак Герцог.
