АҚШ саёҳат тақиқи қўлланиладиган мамлакатлар сонини 30 дан оширишни режалаштирмоқда. Бу ҳақда 4 декабрь куни Қўшма Штатлар Миллий хавфсизлик вазири Кристи Ноэм маълум қилди.
Ноэм Fox News телеканалига берган интервьюсида, президент Дональд Трамп маъмурияти тақиқ рўйхатидаги мамлакатлар сонини 32 тага етказиши ҳақидаги саволга жавоб берган. Таъкидланишича, тақиқ иммигрантлар (кўчиб келувчилар) ва нон-иммигрантларга (масалан, сайёҳлар, талабалар, ишбилармонлар) нисбатан бирдек қўлланилади.
“Аниқ рақамни айта олмайман, лекин тақиқ 30 дан ошиқ давлатга қўлланилади. Президент мамлакатларни баҳолашда давом этмоқда”, деган вазир.
Ноэм тақиқ рўйхатига қайси мамлакатлар қўшилиши ҳақида аниқлик киритмаган, бироқ сабабларни очиқлаган.
“Агар мамлакатларда барқарор ҳукумат бўлмаса ва ўз-ўзини таъминлай олмаса, нега ушбу давлатларнинг аҳолисини Қўшма Штатларга келишига рухсат беришимиз керак?”, деган у.
Маълумот ўрнида, июнь ойида Трамп 12 та давлат фуқароларининг Қўшма Штатларга киришини бутунлай тақиқловчи ва яна 7 та давлат фуқароларига нисбатан чекловлар ўрнатувчи фармонни имзолаган эди. Бу чекловлар “хорижий террористлар” ва бошқа хавфсизлик таҳдидларидан ҳимояланиш зарурлиги билан асосланган.
Тақиқ рўйхатнинг кенгайтирилишига ўтган ҳафта Оқ уй ёнида икки Миллий гвардия аъзосининг отиб ўлдирилиши сабаб бўлмоқда. Айнан шу сабаб Трамп миграция чораларини янада кучайтирмоқда. Ушбу отишмадан бир неча кун ўтиб, Трамп барча “учинчи дунё мамлакатлари”дан миграцияни тўхтатишини маълум қилганди. Бундан ташқари, 19 та давлат фуқароларидан иммиграция бўйича аризалар қабул қилиниши тўхтатилганди.
