Гвинея-Бисауда 26 ноябрь куни тушдан кейин давлат тўнтариши содир бўлди. Мамлакат президенти Умаро Сисоко Эмбало ўз кабинетида бўлган вақтида ҳарбийлар томонидан ҳибсга олинди. Бу ҳақда The Africa Report хабар берди.
Президент Эмбало Жеуне Afrique нашрига ўзининг ҳибсга олинганини тасдиқлаган. Унинг сўзларига кўра, армия штаб бошлиғи бошчилигидаги ушбу давлат тўнтариши пайтида унга нисбатан куч ишлатилмаган. Мамлакат ҳарбийлари барча чегаралар ёпилганини эълон қилиб, бутун давлат бўйлаб сайлов жараёни тўхтатилганини маълум қилган.
Тасдиқланмаган хабарларга кўра, тўнтаришга юқори мартабали ҳарбий амалдорлар ва мамлакат ички ишлар вазири бошчилик қилмоқда. Айни пайтда, The Africa Report ҳибсга олинганлар орасида президентдан ташқари қуролли кучлар штаб бошлиғи генерал Биаге На Нтан, штаб бошлиғининг ўринбосари генерал Мамаду Туре ва ички ишлар вазири Ботче Канде ҳам борлигини қайд этган.
Сайлов жараёнини ёритаётган журналистларнинг айтишича, пойтахтда хавфсизлик ёмон ҳолатда.
“Миллий сайлов комиссияси штаб-квартирасида ва атрофида ўқ овозлари эшитилмоқда. Биз мазкур штаб квартира алоқа ходимининг офисида яширинганмиз”, деган овоз бериш жараёнини ёритган мухбир.
Низоли сайлов ва сиёсий инқироз
Мамлакатда 23 ноябрь куни президентлик сайловлари бўлиб ўтган эди. Эмбало ўз ҳисоб-китобларига таяниб, 65 фоиз овоз билан ғалаба қозонганини шахсан эълон қилган. Таҳлилчиларнинг фикрича, Эмбалонинг ҳокимиятни марказлаштиришга уринишлари, хавфсизлик хизматларини қайта шакллантириши ва сиёсий рақибларни четлаштириши сиёсатчилар ва қуролли кучлар орасида ишончсизликни келтириб чиқарган.
Унинг президентлик натижаларини эрта эълон қилиши ва ўзи айтган статистикани тасдиқлаш учун институтларга босим ўтказиши армиядаги турли гуруҳларнинг қатъий қаршилигига сабаб бўлган. Таъкидланишича, мазкур тўнтариш Гвинея-Бисаунинг узоқ давом этган институционал мўртлигини акс эттирмоқда.
