Финляндия президенти Александр Стабга Исроил ҳақида савол берган журналист полиция томонидан ҳибсга олинди. Бу ҳақда Anadolu хабар берди.
Журналист президентга қуйидагича савол берган:
“Геноцидда айбланган Исроилдан қурол сотиб олиш тўғрими? Бундай давлатдан қурол олиш Финляндияга ярашадими?”
Маълум бўлишича, у бу саволни президент бир тадбирдан чиқиб кетаётганида берган. Президент саволга жавоб бермай, машинага ўтириб кетган. Шундан сўнг журналист: “Кўрдингизми, президентимиз бу ҳақда фикр билдиришни истамади”, дея изоҳ берган.
Воқеа жойидаги полициячи журналистга “Бунинг учун қамоққа тушишингиз мумкин”, деган. Журналист эса ўзини ҳимоя қилиб, “Мен митинг ўтказмаяпман”, деб жавоб қайтарган. Ижтимоий тармоқларда тарқалган видеода журналист полиция томонидан олиб кетилаётгани кўринади. Маълумотларга кўра, у полицияга қаршилик кўрсатганлик айби билан қўлга олинган.
Финляндия ва Исроил муносабатлари
Финляндия шу пайтгача Исроилнинг Фаластин ҳудудларидаги ҳаракатларини танқид қилиб келган. Хусусан, мамлакат ҳукумати яҳудий давлатидан Фаластин ҳудудларидаги босқинни якунлашни сўраган. Финляндия, шунингдек, бошқа бир қанча давлатлар билан бирга, Фаластин-Исроил можаросида икки давлат ечими тарафдоридир.
Айни пайта Ҳелсинки Тель-Авивдан қурол ва мудофаа тизимларини олишни давом эттирмоқда. Масалан, мамлакат Исроилдан David’s Sling номли ракета‑қарши мудофаа тизимини сотиб олингани, бу Финляндия учун Россиядан келувчи таҳдидларга қарши ҳимоя зарурати экани ҳақида маълумотлар бор.
