Португалия ҳамда Норвегия терма жамоалари 2026-йилги Жаҳон чемпионати финал босқичига йўлланмани қўлга киритди. Сўнгги тур баҳсларида ҳар икки жамоа йирик ғалабага эришиб, гуруҳ ғолиби сифатида мундиал иштирокчисига айланди.
Португалия ўз майдонида Арманистонни 9:1 ҳисобида мағлуб этди. Ренато Вейга, Гонсалу Рамуш, Жоау Невеш (хет-трик), Бруно Фернандес (хет-трик, икки пенальти) ва Франсиску Консейсау каби футболчилар киритган голлар португалларга йирик ҳисобда ғалаба келтирди. Арманистоннинг ягона голи Эдуард Сперцян номига ёзилди. Жамоа ушбу ғалаба эвазига “F” гуруҳида биринчи ўринни эгаллаб, ЖЧ-2026 йўлланмасини қўлга киритди.
Норвегия эса сафарда Италияни 4:1 ҳисобида енгди. Антонио Нуса, Эрлинг Ҳоланд (дубль) ва Ёрген Ларсен “викинглар”га ғалаба келтирган голлар муаллифига айланди. Италиянинг ягона голини Франческо Эспосито киритди. Норвегия 24 очко билан “I” гуруҳида биринчи ўринни қўлга киритди ва 1998-йилдан бери илк бор Жаҳон чемпионатига чиқди. Италия эса плей-офф орқали йўлланма олишга уриниб кўради.
Португалия ЖЧ-2026 йўлланмасини қўлга киритган 31-жамоа, Норвегия эса 32-жамоага айланди. Аввалроқ АҚШ, Канада, Мексика, Япония, Эрон, Корея Республикаси, Иордания, Австралия, Ўзбекистон, Янги Зеландия, Аргентина, Эквадор, Бразилия, Колумбия, Уругвай, Парагвай, Марокаш, Тунис, Миср, Жазоир, Гана, Кабо-Верде, Жанубий Африка, Қатар, Англия, Саудия Арабистони, Сенегал, Кот-д’Ивуар, Франция ва Хорватия финал босқичи иштирокчисига айланганди.
Маълумот учунм Жаҳон чемпионати 2026 йил 11 июндан 19 июлгача АҚШ, Канада ва Мексика майдонларида бўлиб ўтади. Мусобақага қуръа ташлаш маросими 2025 йил 5 декабрь куни Вашингтонда ўтиши белгиланган.
