Исроил мудофаа кучлари (IDF) Ливан жанубидаги бир нечта биноларга ҳаводан ҳужум уюштирди. Ҳарбийларнинг айтишича, бу бинолар “Ҳизбуллоҳ” гуруҳи томонидан ҳарбий мақсадларда ишлатилар эди. Бу ҳақда The Jerusalem Post хабар берди.
IDF разведкаси Ливан жанубидаги “Ҳизбуллоҳ” фаолиятини харитага туширишга муваффақ бўлган. Унга кўра, Набатия шаҳри жангарилар қуролланиши ва инфратузилмасини қайта тиклаш марказига айлангани аниқланган. Сўнгги бир ой давомида IDF ушбу ҳудудга олти марта зарба берган. Ҳарбийлар бу зарбалар орқали “Ҳизбуллоҳ”нинг юқори қўмондонлиги ва логистика тизимини издан чиқаришни мақсад қилганини таъкидламоқда.
Тир шаҳри яқинидаги ҳужумлар ҳам “Ҳизбуллоҳ”нинг террор инфратузилмасини тиклаш имкониятларига жиддий зарар етказган. Исроил ҳарбийларига кўра, бу зарбалар фақат жангариларни йўқ қилишга эмас, балки бутун тизимни издан чиқаришга қаратилган.
IDF маълумотига кўра, “Ҳизбуллоҳ” жангарилари Тир ва бошқа жанубий қишлоқ ҳудудларда ерости туннел ва бункерларини қайта қуришга уринмоқда. Исроилнинг аниқ нишонга олинган зарбалари эса ҳарбий разведканинг ҳудудда кучли назорат ўрнатганини кўрсатмоқда.
Бироқ Исроил хавфсизлик идоралари жанубий Ливандаги шиа аҳолиси “Ҳизбуллоҳ”нинг ҳаракатларига қарши чиқмаётганидан хавотир билдирмоқда. Уларнинг фикрича, маҳаллий аҳоли жангариларнинг фаолиятини яширинча қўллаб-қувватламоқда.
“Ҳизбуллоҳ” инфратузилмаси харитаси эълон қилинди
Исроил армияси “Ҳизбуллоҳ”нинг жанубий Ливандаги қайта тикланиш фаолиятини акс эттирувчи янги харитани ҳам тақдим этган. Унда бир нечта стратегик жойлар қайд этилган:
1. Бофорт тизмаси — ракета учириш жойлари ва мудофаа тизимлари қайта қурилмоқда;
2. Айн Кана — юқори лавозимли жангарилар йўқ қилинган;
3. Блида — қурол омборлари, кузатув пунктлари ва разведка жойлари ташкил этилган.
Қурол омборлари йўқ қилинди
10 ноябрь куни кечқурун IDFнинг 769-бригадаси Ҳула қишлоғида “Ҳизбуллоҳ”га тегишли бир нечта биноларни аниқлаб, вайрон қилган. Ҳарбийлар октябрь ойида ҳам шу ҳудудда портловчи моддалар ва эски қуроллар яширилган омборларни йўқ қилган эди. Исроил томони бу операциялар орқали “Ҳизбуллоҳ”нинг жанубий Ливанда қайта куч тўплашига йўл қўймасликни мақсад қилганини билдирмоқда.
